पोखरा विमानस्थलमा विश्व खाद्य कार्यक्रम (डब्लुएफपी) ले मानवीय सहायता केन्द्र निर्माण थालेको छ।
युरोपेली संघको १ लाख ६१ हजार अमेरिकी डलरको सहयोगमा बनाउन लागिएको उक्त केन्द्रको बिहीबार कास्कीका प्रमुख जिल्ला अधिकारी वासुदेव घिमिरेले शिलान्यास गरेका हुन्।
मानवीय सहायता केन्द्र स्थापना भएपछि गण्डकी प्रदेशमा आउने मानवीय संकटका बेला उद्धार र राहत प्रभावकारी हुने उनले विश्वास लिए।
मानवीय सहायता केन्द्र बनाउन नेपाल नागरिक उड्डयन प्राधिकरणले पोखराको पुरानो विमानस्थलमा करिब ४ रोपनी जग्गा उपलब्ध गराएको छ। केन्द्रको व्यवस्थापन भने विश्व खाद्य कार्यक्रमले सञ्चालन गर्नेछ।
मानवीय सहायता केन्द्रमा अत्यावश्यक राहतका सामग्री, उद्धारका उपकरण, गोदामघर, प्रिफ्याबका घरहरू, खाद्यान्न, जेनेरेटर, ज्याक लिफ्टलगायत सामग्री राखिने डब्लुएफपीका परियोजना प्रबन्धक मोती थापाले बताए।
‘हामीले अहिलेसम्म ११ वटा यस्ता मानवीय सहायता केन्द्र बनाइसकेका छौं, अब अन्तिममा पोखरा विमानस्थलमा बनाउँछौं,’ उनले भने, ‘यसले गण्डकी प्रदेशमा मानवीय संकटमा साथ दिनेछ।’
मानवीय सहायता केन्द्रमार्फत् गण्डकीमा विपत्तिका बेला आउने राहत सामग्रीको अभिलेख राख्ने, सहजीकरण गर्ने र उद्धार एवं राहत वितरणलाई छरितो बनाउने उद्देश्य रहेको उनले बताए।
त्रिभुवन अन्तर्राष्ट्रिय विमानस्थलमा राखिएको मानवीय सहायता स्थलले २०७२ को भूकम्पमा उल्लेख्य काम गरेको उनले बताए।
शिलान्यास समारोहमा युरोपेली संघका राजदूत भेरोनिक लोरेन्जोले नेपाल प्राकृतिक विपत्तिको जोखिममा रहेको बताए।
‘विपत्तिबाट गरिब समुदाय बढी पीडित हुन्छन्,’ उनले भने, ‘आपतकालीन प्रतिकार्य केन्द्र संकटका बेला जीवन बचाउन सहयोगी हुनेछ।’
विश्व खाद्य कार्यक्रमका नेपाल प्रतिनिधि तथा निर्देशक रोबर्ट काश्काले विपदको पूर्वतयारीमा लगानी गर्दा मानिसको जीवन र समय बचाउन सकिने बताए।
पोखरामा मानवीय सहायता केन्द्र बनाउन सहयोग गरेको भन्दै उनले युरोपेली युनियनलाई धन्यवाद दिए।
विश्व खाद्य कार्यक्रमले सन् २०१३ देखि देशभर आपतकालीन तयारी स्वरूप मानवीय सहायता स्थलहरूको संजाल बनाएको छ।
यस्तो संजालले भूकम्प, बाढी, पहिरो जस्ता प्राकृतिक विपत्तिको सामना गर्न र पीडितको उद्धार गर्न सघाउ पुर्याउने डब्लुएफपीकी संचार अधिकृत मोनिका उपाध्यायले बताइन्।