बंगलादेशी नागरिकहरूलाई युरोप पठाउने भनेर काठमाडौं ल्याई बन्धक बनाएको आरोपमा प्रहरीले चार जनालाई पक्राउ गरेको छ।
काठमाडौं उपत्यका अपराध अनुसन्धान कार्यालयले चार जनालाई पक्राउ गरेको एसपी नकुल पोखरेलले जानकारी दिए।
पक्राउ पर्नेमा बंगलादेश ढाकाका ३८ वर्षीय नुरूल हुडा, ३१ वर्षीय सामिम अहमद, ३० वर्षीय मोहम्मद मासुम बिल्लाह र ३३ वर्षीय प्रणयकुमार दे छन्।
उनीहरूले बंगलादेशी नागरिकहरूलाई वैदेशिक रोजगारका लागि क्यानडा, इटाली लगायत देशहरूमा पठाइदिने भनेर विश्वास दलाएका थिए। बंगलादेशबाट नेपाल ल्याएर काठमाडौं महानगरपालिका-१६ पकनाजोलस्थित निभाना ग्रिन पिस होम नामक होटलको कोठामा राखिएको थियो।
त्यहाँ चार जना पीडितका पासपोर्ट नियन्त्रण लिइएको एसपी पोखरेलले बताए। त्यस्तै धम्की र कुटपिट समेत गर्ने गरेको प्रहरीले जनाएको छ।
चार जना पीडितले आफूहरूलाई बन्धक बनाएको भनेर प्रहरीलाई सम्पर्क गरिएको थियो। सम्पर्क गरेपछि कार्यालयको टोलीले उनीहरूलाई बिहीबार उद्धार गरेको हो।
उनीहरू अहिले प्रहरीको सम्पर्कमा छन्। उनीहरूलाई कति रकम लिएर नेपाल ल्याइएको भन्ने खुलेको छैन।
