नेपाली कांग्रेस सल्यानका सभापति केशबहादुर विष्टमाथि आक्रमण गरेको आरोपमा पक्राउ परेका भौतिक पूर्वाधार कार्यालय प्रमुख हरिबहादुर वलीलाई पाँच दिन हिरासतमा राख्न प्रहरीले अनुमति पाएको छ।
आइतबार अदालतले पाँच दिन हिरासतमा राखेर घटना अनुसन्धानका लागि अनुमति प्रदान गरेको जिल्ला प्रहरी प्रमुख डिएसपी नवीन कार्कीले जानकारी दिए।
वलीलाई प्रहरीले आइतबार बिहान नियन्त्रणमा लिएको थियो।
चैत २९ गते बेलुकी सल्लीबजारस्थित बालुवा संग्रहको कृष्ण होटलमा ५६ वर्षीय विष्ट र कार्यालय प्रमुख ३६ वर्षीय वलीबीच सामान्य विवाद हुँदा वलीले आफूमाथि कुटपिट गरेको भन्दै विष्टले किटानी जाहेरी दिएका थिए।
सभापति विष्टको टाउकोमा चोट लागेको छ। उनको टाउकोमा पाँच वटा टाँका लगाइएको डिएसपी कार्कीले बताए। पक्राउ परेका वलीले प्रतिकार गर्नेक्रममा विष्टमाथि चोट लागेको दाबी गर्दै आएका छन्।
प्रहरीले वलीमाथि कुटपिट तथा अभद्र व्यवहार सम्बन्धी मुद्दामा अनुसन्धान अघि बढाएको हो।
