सञ्चार तथा सूचना प्रविधि मन्त्री रेखा शर्माले राजनीतिक व्यवस्था परिवर्तन भए पनि जनताको अवस्था परिवर्तन हुन नसकेको बताएकी छन्।
जनताको अवस्था सुधारका लागि संविधानमा मौलिक हकहरूको व्यवस्था गरेपनि त्यसको कार्यान्वयन हुन नसक्दा जनताको अवस्था परिवर्तन हुन नसकेको मन्त्री शर्माले बताइन्।
सोमबार उनले घोराहीमा आयोजित नेपाल पत्रकार महासंघ दाङको २२ औं साधारणसभा तथा १२ औं अधिवेशन एंव मिडिया महोत्सव उद्घाटन गरेकी हुन्।
मन्त्री शर्माले जनताको अवस्था परिवर्तनका लागि कानुन कार्यान्वयन पहिलो शर्त भएको र त्यसको कार्यान्वयनका लागि सरकार र मिडिया एक भएर अगाडि बढ्नुपर्ने बताइन्।
कार्यक्रममा बोल्दै उनले अभिव्यक्ति स्वतन्त्रता र राजनीतिक स्वतन्त्रताको लागि सरकार प्रतिबद्ध रहेको पनि बताइन्।
अहिले राजनीतिक स्थायित्व भएपनि राजनीतिक अभिभारा पूरा गर्न बाँकी रहेको उनको भनाइ छ।
संविधानमा लेखिएका मौलिक हकको कार्यान्वयनका लागि मिडियाले भूमिका खेल्नुपर्ने उनको भनाइ छ।