विपद व्यवस्थापन र खेलकुदमा उत्कृष्ट कार्य गर्ने सशस्त्र प्रहरी बलका पाँच जना कर्मचारीले युएन मिसनमा सहभागी हुने अवसर पाएका छन्।
गोताखोर तथा विपद् व्यवस्थापन तालिम प्राप्त गरेका र र राष्ट्रिय तथा अन्तर्राष्ट्रिय विधाका प्रतियोगिताहरूमा उत्कृष्ट खेलेका पाँच जनालाई युएन मिसनमा जाने अवसर दिइएको सशस्त्र प्रहरी नायब महानिरीक्षक मनिष थापाले जानकारी दिए।
यसरी मिसनमा जानेहरूमा सशस्त्र प्रहरी सहायक निरीक्षक दीपेन्द्र विष्ट, सहायक हवल्दार भरत काफ्ले, सहायक हवल्दार मेखबहादुर गुरूङ, सहायक हवल्दार किरणबहादुर भण्डारी र प्रहरी परिचर पुरन राई छन्।
सशस्त्र प्रहरी सहायक निरीक्षक दीपेन्द्र विष्टले विपद्को समयमा देशका विभिन्न भागमा १९ पटकसम्म खटिएर १० जनाको सकुशल उद्धार र ११ वटा शव निकालेका थिए। उनले दुई जना पर्यटकलाई उद्धार गरेका थिए।
यसैगरी सशस्त्र प्रहरी सहायक हवल्दार भरत काफ्लेले गत चैत १३ गते सुनसरीको इटहरी उपमहानगरपालिका–६ स्थित सेन्टर प्लाजाको चौथो तलामा भएको आगलागीमा फसेका ११ जनामध्ये ५ जनाको रोप रेस्क्यु विधिमार्फत सकुशल उद्धार गरेका थिए। त्यस्तै विभिन्न घटनामा १५ जनाको शव निकालेका थिए।
त्यसैगरी, सशस्त्र प्रहरी सहायक हवल्दार मेखबहादुर गुरूङ गोताखोर तालिम प्राप्त गरी १७ वटा तालिमहरूमा उत्कृष्ट प्रशिक्षकको रूपमा निरन्तर खटिएका छन्। उनले विभिन्न घटना तथा दुर्घटनामा परी ज्यान गुमाएका २२ जनाको शव निकालेका थिए।
सशस्त्र प्रहरी सहायक हवल्दार किरणबहादुर भण्डारी गत वर्षको उत्कृष्ट ‘वर्ष जवान–२०८१’ घोषित भएका थिए।
त्यसैगरी सशस्त्र प्रहरी परिचर पुरन राईले नेपाल एपीएफ क्लबमा आबद्ध रही बक्सिङ विधामा ८ स्वर्ण, ३ रजत र १ कास्य गरी जम्मा १२ वटा पदक प्राप्त गरेका थिए।
उनीहरूले राष्ट्रसंघको अनुरोधमा शान्ति स्थापनार्थ युनाइटेड नेशन्स मिसन इन साउथ सुडानमा सहभागी हुन जान लागेका हुन्।
-1746009348.jpg)
