भक्तपुरमा एक जना पुरूषको हत्या भएको छ।
सोमबार बिहान सवा ७ बजे भक्तपुर नगरपालिका-३ वंशगोपाल डेगोमनास्थित एक निर्माणाधीन साढे ३ तले घरबाट एक जना पुरूषको शव फेला परेको हो।
मृतक उदयपुर घर भएका ३४ वर्षीय पूर्ण ठकुरी छन्। काठले हिर्काएर हत्या गरिएको जस्तो अवस्थामा शव फेला परेको जिल्ला प्रहरी परिसर भक्तपुरका डिएसपी प्रकाश जबेगुले जानकारी दिए।
पूर्ण ठकुरीको हत्या आरोपमा प्रहरीले उनकै सहकर्मी धनकुटा सागुरीगढी गाउँपालिका-३ का २७ वर्षीय सञ्जीव याखालाई पक्राउ गरेको छ।
उनीहरू दुबै जना निर्माणाधीन घरमा ज्यामी काम गर्दै आएका थिए।
आइतबार पूर्णले आफ्नो ज्यालाको ५०० रुपैयाँसँगै संजिबको पनि पैसा लिएका थिए।
उनीहरूले गएराति मापसे समेत गरेको डिएसपी जबेगुले बताए।
यही विषयमा दुई पक्षबीच विवाद हुँदा सञ्जीवले पूर्णमाथि काठले कुटपिट गरेको आरोप छ।
घटनापछि प्रहरीले सञ्जीवलाई नियन्त्रणमा लिएको छ।
शव पोष्टमर्टमको लागि काठमाडौं मेडिकल कलेजमा पठाएको छ।
घटनाको प्रहरीले थप अनुसन्धान अघि बढाएको छ।
-1746009348.jpg)
