केन्द्रीय अनुसन्धान ब्युरो (सिआइबी) को हिरासतमा रहेका सेयर कारोबारी दीपेन्द्र अग्रवाल 'अनशन'मा बसेका छन्।
सेयर कारोबार गर्दा हिनामिना गरेको आरोपमा पुस ४ गते पक्राउ परेका अग्रवालले आफ्नो मुद्दा छिटो बुझाइदिन माग गर्दै 'अनशन' बसेका हुन्।
सिआइबीका प्रवक्ता तथा एसएसपी शिवकुमार श्रेष्ठले सोमबार खाना नखाएको भन्ने विषयको रिपोर्टिङ भएको बताए।
‘खाना नखाएको भन्ने विषयमा आज रिपोर्टिङ भएको छ। मुद्दा चाँडो बुझाइदिनुपर्यो भन्ने छ। अनुसन्धान भइरहेको विषयमा तुरून्तै हुने अवस्था पनि होइन,’ उनले भने।
आवश्यक परे अस्पताल लैजान भनेर निर्देशन भएको पनि उनले बताए।
अग्रवालविरूद्ध नेपाल धितोपत्र बोर्डले उजुरी गरेपछि सिआइबीले पक्राउ गरेको थियो।
बोर्डले गरेको प्रारम्भिक जाँचबुझ प्रतिवेदनका अनुसार अग्रवालले जोशी हाइड्रोपावर डेभलपमेन्ट कम्पनी लिमिटेडको सेयर खरिद गरेका थिए।
उनले धितोपत्रसम्बन्धी ऐन, २०६४ को दफा ९७ (ग) बमोजिम झुक्क्याउने विवरण दिएर भ्रामक सूचना सार्वजनिक गरेको आरोप छ।
उक्त दफाको ‘ग’ मा भनिएको छ, ‘बदनीयत साथ कुनै तथ्य वा जानकारी लुकाउने र बदनीयत साथ झूटा वा भ्रामक विवरण प्रतिज्ञा वा पूर्वअनुमान बनाउने वा प्रकाशित गर्ने।’
यसरी बदनीयत राखेर उनले सेयर बिक्री गरी ४९ लाख १९ हजार ८६५ रुपैयाँ कानुन विपरीत नाफा कमाएको एसएसपी श्रेष्ठले बताए।
अग्रवालले अन्य टिएमएस युजर प्रयोग गरी आपसी खरिदबिक्री तथा आफन्त सम्बद्ध संस्थाबीच वास्तविक स्वामित्व नबदलिने गरी कारोबार गरेको आरोप छ।
त्यस्तै यसरी उनले कर्पोरेट डेभलपमेन्ट बैंकको सेयर मूल्य पनि कृत्रिम रूपमा बढाएको देखिएको हो।
उनले सोही ऐनको दफा ९४ को क र ख अनुसार र दफा ९५ अनुसार झूटो कारोबार र मूल्य प्राभवित पार्ने कसूर समेत गरेको बोर्डको प्रतिवेदनमा देखिएको थियो।
सोही प्रतिवेदनको आधारमा प्रहरीले अग्रवाललाई पक्राउ गरेको थियो। यसअघि पनि प्रहरीले अग्रवाललाई ठगी कसूरमा पक्राउ गरिसकेको छ।
-1746009348.jpg)
