अमेरिकी अध्यागमन अधिकारीहरूले मिनियापोलिसमा एक महिलामाथि गोली चलाएको घटनाको भोलिपल्ट पोर्टल्याण्डमा पनि गोली चलेको छ।
ओरेगनको पोर्टल्याण्ड सहरमा बिहीबार अध्यागमन अधिकारीहरूले गोली चलाउँदा दुई जना स्थानीय घाइते भएको अन्तर्राष्ट्रिय सञ्चारमाध्यमहरूले जनाएका छन्।
गोलीकाण्ड पोर्टल्याण्डको एउटा अस्पताल नजिकै स्थानीय समयअनुसार बिहीबार दिउँसो सवा २ बजे भएको थियो।
अन्तर्राष्ट्रिय समाचार संस्था एशोशियटेड प्रेसका अनुसार अस्पताल नजिक अध्यागमन अधिकारीले चलाएको गोली लागेर एक व्यक्ति घाइते भएका थिए। लगत्तै अर्का व्यक्ति पनि गोली लागेर घाइते भएको अवस्थामा सहायता माग्दै आएका थिए।
घटनाको एफबिआईले छानबिन गरिरहेको छ। घाइतेहरुको अवस्था तत्काल सार्वजनिक भएको छैन।
पोर्टल्यान्ड सिटी काउन्सिलकी अध्यक्ष एलाना पर्टल–गिनीले सिटी काउन्सिल बैठकमा घटनाको ब्रिफिङ गरेकी थिइन्। उनले गोली लागेकाहरू स्थानीय बासिन्दा नै रहेको पनि बताएको भनेर एपीले लेखेको छ।
यो घटना मिनेसोटामा एक आप्रवासन तथा भन्सार प्रवर्तन (आईसीई) अधिकारीले एक महिलालाई गोली हानी हत्या गरेको भोलिपल्ट भएको हो।
सो घटनापछि राष्ट्रपति डोनाल्ड ट्रम्प र पोर्टल्यान्ड सहरबीच लामो समयदेखि रहेको तनाव अझ चर्किएको छ। ट्रम्प प्रशासनले हालै नेसनल गार्ड तैनाथ गर्ने प्रयास गरे पनि त्यो सफल हुन सकेको थिएन।
घटनापछि पोर्टल्यान्ड प्रहरीले गोली चलेको स्थान र घाइते फेला परेको क्षेत्रलाई नियन्त्रणमा राखी अनुसन्धान अघि बढाएको छ।
पोर्टल्याण्ड प्रहरी प्रमुख बब डेले भने, 'हामी अहिले प्रारम्भिक चरणमा छौँ। मिनेसोटाको घटनापछि समुदायमा भावना र तनाव बढेको हामी बुझ्छौँ, तर सबैलाई शान्त रहन आग्रह गर्दछु।'
यसैबीच, पोर्टल्यान्डका मेयर किथ विल्सन र सिटी काउन्सिलले पूर्ण अनुसन्धान नसकिँदासम्म सहरमा आईसीईका सबै गतिविधि रोक्न माग गरेका छन्।
संयुक्त विज्ञप्तिमा उनीहरूले संवैधानिक अधिकार कमजोर हुँदै गएको र रक्तपात बढ्दै गएकोप्रति गम्भीर चिन्ता व्यक्त गरेका छन्।
'पोर्टल्यान्ड कुनै सैन्यीकृत एजेन्टहरूको अभ्यासस्थल होइन,' विज्ञप्तिमा भनिएको छ।
ओरेगनका डेमोक्र्याट सिनेटर जेफ मर्क्लीले सम्भावित प्रदर्शनकारीहरूलाई शान्त रहन आग्रह गरेका छन्।
सामाजिक सञ्जाल एक्समा उनले लेखेका छन्, 'ट्रम्प दंगा भड्काउन चाहन्छन्। त्यसको पासोमा नपर्नुहोस्।'
मिनियापोलिससको मिनिसोटामा बुधबार ३७ वर्षीया रेनी निकोल गुड माथि अध्यागमन अधिकारीहरूले गोली चलाउँदा उनको मृत्यु भएको थियो।
उनी एक पुरस्कारप्राप्त कवि, तीन सन्तानकी आमा र चलचित्रप्रेमी थिइन् भनेर अमेरिकी मिडियाहरूले लेखेका छन्।
घटनापछि मिनियापोलिसमा विरोध चर्किएको छ।
-1746009348.jpg)
