पोखराको फोहोरमैला व्यवस्थापन विवादमा खुकुरी नचाएका वडाध्यक्ष रामचन्द्र अधिकारी प्रहरी हिरासतबाट रिहा भएका छन्।
पोखरा–३३ झाँक्रीखोलामा महानगरको फोहोर व्यवस्थापन गर्न निजी कम्पनीसँग सम्झौता भएपछि स्थानीयबासी आन्दोलित छन्।
वडा कार्यालय अगाडि आन्दोलनमा उत्रिएका स्थानीयबासीलाई अपशब्द बोल्दै खुकुरी प्रहार गर्न खोजेपछि गत शुक्रबार वडाध्यक्ष अधिकारीलाई प्रहरीले नियन्त्रणमा लिएको थियो।
प्रहरीले नियन्त्रणमा नलिएको भए स्थानीय आन्दोलनकारीमाथि खुकुरी प्रहारको घटना हुन सक्ने भन्दै शान्ति सुरक्षा माग गरेको स्थानीय राम थापाले बताए।
‘वडाध्यक्ष रिहा भएपछि हामीले प्रशासनसँग शान्ति सुरक्षा पनि माग गरेका छौं,’ उनले भने, ‘गाउँलेलाई थाहा नै नदिइकन ल्याण्डफिल साइट बनाउने निर्णयको विरोधमा मात्र होइन, अब सुरक्षा चाहियो भनेर पनि आन्दोलन गर्नुपरेको छ।’
पोखरा वडा नम्बर ३३ को वडा कार्यालय अगाडिबाट प्रहरीले नियन्त्रणमा लिएको वडाध्यक्ष अधिकारीलाई शनिबार साँझ प्रहरीले रिहा गरेको थियो।
उनीविरूद्ध जाहेरी नआएका कारण रिहा गरेको कास्की प्रहरीका सूचना अधिकारी डिएसपी हरिबहादुर बस्नेतले बताए।
‘हामीले वडाध्यक्षलाई खुकुरीसहित नियन्त्रणमा लिएका थियौं, उहाँको विरूद्ध जाहेरी नआएपछि रिहा हुनुभयो,’ उनले भने, ‘जाहेरी आए दर्ता गर्छौं।’
स्थानीयबासीले ठाडो उजुरी दिएकाले २४ घण्टा नियन्त्रणमा राखेर रिहा गरेको डिएसपी बस्नेतले बताए।
मुद्दा प्रक्रियामा जान जाहेरी चाहिने भएकाले जाहेरी ल्याउन स्थानीयबासीलाई आग्रह गरेको पनि उनले बताए।
‘वडाध्यक्षका विरूद्ध स्थानीयबासीले ठाडो उजुरी दिनुभएको थियो। मुद्दा प्रक्रियामा जान जाहेरी ल्याउनु भनेर हामीले भनेका थियौं,’ उनले भने, ‘अहिलेसम्म जाहेरी आएको छैन।’
पोखरा–३३ का स्थानीयबासी भने जाहेरी दिन जाँदा प्रहरीले दर्ता गर्न नमानेको बताएका छन्।
वडाध्यक्ष अधिकारी विरूद्ध शनिबार जिल्ला प्रहरी कार्यालय पुगेका स्थानीयबासीले ज्यान मार्ने उद्योग र शान्ति सुरक्षा पाऊँ भन्ने जाहेरी लगेका थिए। उक्त जाहेरी प्रहरीले दर्ता गर्न नमानेको स्थानीय बताउँछन्।
वडाध्यक्ष अधिकारी रिहा भएपछि गण्डकी प्रदेश सांसद भीम कार्कीसहित स्थानीयबासी सिडिओ कार्यालय पुगेका थिए। कास्कीकी सिडिओ रूद्रादेवी शर्माले जाहेरी दर्ता हुने र अनुसन्धान गरी कानुन अनुसार कारबाही हुने बताएकी थिइन्।
पोखरा महानगरपालिकाले मंसिर २ गते टेरासोल्भ परिन्युवल नेपाल प्रालिसँग सम्झौता गरेको थियो। सार्वजनिक निजी साझेदारी अवधारणा अन्तर्गत भएको संझौतामा उक्त कम्पनीले ८० करोड रुपैयाँ लगानी गर्ने र २१ वर्षपछि फोहोर प्रशोधन केन्द्र महानगरलाई हस्तान्तरण गर्ने उल्लेख छ।
झाँक्री खोलामा फोहोरमैला व्यवस्थापन गर्न खोजेको भन्दै स्थानीयबासीले सोमबार पनि विरोध प्रदर्शन गरेका थिए।
पोखरा उपत्यका नगर विकास समितिको कार्यालय अगाडि विरोध प्रदर्शन गरेका उनीहरूले सार्वजनिक सुनुवाइ आयोजना गर्न माग गरेका छन्। स्थानीयबासीले झाँक्री खोलामा ल्याण्डफिल साइट बनाउन नदिने भन्दै विगतदेखि नै आन्दोलन गर्दै आएका छन्।
स्थानीयबासी विरूद्ध खुकुरीसहित उत्रिएका वडाध्यक्ष अधिकारी २०७९ को स्थानीय निर्वाचनमा नेपाली कांग्रेसका तर्फबाट वडाध्यक्ष निर्वाचित भएका थिए।
नेकपा माओवादीको भ्रातृ संगठन वाइसिएलमा संलग्न भएर राजनीति थालेका अधिकारीपछि कांग्रेस प्रवेश गरेका थिए।
-1746009348.jpg)
