मौसमविदले शुक्रबार अपराह्नदेखि पश्चिम नेपालबाट वर्षा सुरू हुने प्रक्षेपण गरेका छन्। पश्चिमी वायुको प्रभावका कारणले नेपालको पश्चिमी भूभागमा वर्षा हुन लागेको मौसमविद् विनोद पोखरेलले जानकारी दिएका छन्।
‘अपराह्नदेखि आज यो वर्षको पहिलो माघेझरी आउँदै छ,’ उनले भने।
यसपटक पश्चिम नेपालमा अर्थात् सुदूपश्चिमदेखि गण्डकीसम्म मध्यम वर्षा हुने उनले बताएका छने। यसपटक बागमती र कोशीका केही ठाउँमा हल्का वर्षाको मात्रै सम्भावना छ।
उनले दोस्रो माघेझरी मंगलबार भित्रन लागेको पनि प्रक्षेपण गरेका छन्। त्यसले नेपालभर वर्षा गराउने उनको आकलन छ।
जल तथा मौसम विज्ञान विभागले पनि हाल देशमा पश्चिमी वायुको आंशिक प्रभाव रहेको जनाएको छ। जल तथा मौसम पूर्वानुमान महाशाखाले देशका विभिन्न भागमा आज मौसममा बदली हुने पूर्वानुमान गरेको छ।
शुक्रबार दिउँसो कर्णाली र सुदूरपश्चिम प्रदेशमा साधारणतया बदली रहनेछ भने बाँकी प्रदेशका पहाडी भू–भागमा आंशिक बदली हुनेछ। तराईका अधिकांश भागमा भने मौसम मुख्यतया सफा रहने अनुमान छ।
सुदूरपश्चिम प्रदेशका केही स्थानमा मध्यम वर्षाको सम्भावना रहेको तथा कर्णाली र सुदूरपश्चिम प्रदेशका उच्च पहाडी तथा हिमाली भागका केही स्थानमा हल्का हिमपात हुन सक्ने महाशाखाले जनाएको छ।
त्यसैगरी, आज राति बागमती, गण्डकी, लुम्बिनी, कर्णाली तथा सुदूरपश्चिम प्रदेशमा साधारणतया बदली रहनेछ भने बाँकी भागमा आंशिक बदली रहने पूर्वानुमान छ। लुम्बिनी, कर्णाली, सुदूरपश्चिमका साथै गण्डकी प्रदेशका केही स्थानमा मेघगर्जन र चट्याङसहित मध्यम वर्षा हुने सम्भावना छ।
यसैगरी, गण्डकी प्रदेश, कर्णाली प्रदेश र सुदूरपश्चिम प्रदेशका उच्च पहाडी तथा हिमाली भू–भागका केही स्थानमा मेघगर्जन र चट्याङसहित मध्यम हिमपात हुने सम्भावना छ। साथै, गण्डकी, लुम्बिनी, कर्णाली र सुदूरपश्चिम प्रदेशका एकदुई स्थानमा मेघगर्जन, चट्याङ र असिनासहित वर्षा हुने सम्भावना रहेको महाशाखाले जनाएको छ।
मौसमी परिवर्तनका प्रभावले दैनिक जनजीवन, पर्यटन, स्वास्थ्य सेवाका साथै हवाई तथा सडक यातायातमा असर पर्न सक्ने भएकाले आवश्यक सतर्कता अपनाउन महाशाखाले आग्रह गरेको छ।
-1746009348.jpg)
