काठमाडौं महानगरपालिकाले सडक किनारा, पार्क र नदी करिडोरमा पैदल यात्रीलाई बस्न राखिएका सार्वजनिक कुर्सी किन हटाइयो भन्नेबारे स्पष्टीकरण दिएको छ।
बालेन शाहले मेयरबाट राजीनामा दिनासाथ सार्वजनिक स्थलमा राखिएका कुर्सी हटाइयो भनेर टीकाटिप्पणी सुरू भएपछि काठमाडौं महानगरले स्पष्टीकरण दिँदै ती कुर्सी मर्मतसम्भार र व्यवस्थापनका लागि झिकिएको जनाएको छ।
सार्वजनिक स्थानमा राखिएका कुर्सी पुराना र जीर्ण भएकालाई मर्मतसम्भार र रंगरोगन गर्न झिकिएको महानगरको सार्वजनिक निर्माण विभागका प्रमुख सुरेश राईले बताए।
'सार्वजनिक स्थलमा राखिएका कुर्सी हटाइएको होइन, त्यसलाई अझ राम्ररी व्यवस्थापन गर्न लागिएको हो,' उनले भने, 'यात्रुको चाप भएका ठाउँमा कुर्सीको संख्या थप्ने, एक ठाउँमा एकै प्रकारका कुर्सी राखेर एकरूपता ल्याउने र सार्वजनिक स्थलका कुर्सीलाई आकर्षक र प्रयोगमैत्री बनाउने काम भइरहेको हो।'
पछिल्लो समय सामाजिक सञ्जालमा बालेन शाहले मेयरबाट राजीनामा दिएपछि पैदलयात्रीका लागि राखिएका कुर्सी हटाएको भनेर काठमाडौं महानगरको आलोचना भइरहेको छ।
महानगरले सिंहदरबार-भद्रकाली सडक खण्डमा राखिएका फलाम र काठ मिश्रित कुर्सीहरूको मर्मत सुरू गरेको छ।
यहाँ दुई प्रकारका कुर्सी थिए। पुराना कुर्सी मर्मतसम्भार र रंगरोगन गरेर यथास्थानमा राखिने विभागका प्रमुख राईले जानकारी दिए।
२०८१ असोजमा महिनामा सहरका विभिन्न ठाउँमा १४० वटा सार्वजनिक कुर्सी राखिएका थिए। यी कुर्सी साढे १ मिटर लम्बाइ र आधा मिटर चौडाइका छन्।
भद्रकालीदेखि सिंहदरबार सडक खण्डअन्तर्गत पैदल मार्गमा ११ वटा कुर्सी राखिएका छन्।
यसबाहेक बागमती नदी करिडोर, गुह्येश्वरी, कोटेश्वर, कालमोचन लगायतका ठाउँमा पनि कुर्सी राखिएका थिए।
महानगरले यो अभियानलाई निरन्तरता दिँदै दोस्रो चरणमा ४९ कुर्सी राख्ने तयारी गर्दैछ। यी कुर्सीहरू नापी विभाग, तीनकुने-कोटेश्वर खण्ड, रत्नपार्क, माइतीघर-बबरमहल, कमलपोखरी लगायत स्थानमा राखिनेछन्।
-1769332421.jpg)
-1769332422.jpg)
-1769332422.jpg)
-1769332421.jpg)
-1746009348.jpg)
