ओखलढुंगामा दम्पतीको हत्या भएको छ।
मंगलबार बिहान करिब साढे ७ बजेतिर चिशंखुगढी गाउँपालिका ६ स्थित एक घरमा दम्पतीको हत्या गरिएको अवस्थामा शव फेला परेको हो।
जिल्ला प्रहरी कार्यालय ओखलढुंगाका प्रहरी निरीक्षक बिक्रमबहादुर भट्टराईका अनुसार लुटपाट गर्ने उद्देश्यले हत्या गरेको आशंका छ।
मृतक करिब ८० वर्षीय चन्द्रबिक्रम राई र उनकी श्रीमती चन्द्रमाया राई छन्।
‘घरमा किराना पसल रहेछ। त्यहाँको पैसा राख्ने ठाउँ फुटाइएको छ। लुटपाटकै लागि भएको देखिन्छ,’ प्रहरी निरीक्षक भट्टराईले भने।
उनका अनुसार घरमा दम्पतीमात्रै बस्थे।
यसअघि पनि ओखलढुंगामा दम्पती र अर्का एक जनाको पनि हत्या भएको थियो।
‘पहिले हत्या गरेजस्तै प्रकृतिको छ। घटनाबारे अनुसन्धान गर्दैछौं,’ उनले भने, ‘तालिम प्राप्त कुकुरसहितको टोली बोलाएका छौं।’
यसअघि केन्द्रीय अनुसन्धान ब्युरो (सिआइबी)को टोलीले लुटपाट र हत्यामा संलग्न गिरोह भन्दै चार जनालाई पक्राउ गरेको थियो।
पक्राउ पर्नेमा ओखलढुंगा चिसाङ्ग गाउँपालिका-३ का २८ वर्षीय मिलन भन्ने संगम राई, रातमाटे बस्ने ३० वर्षीय विनोद राई, ३० वर्षीय प्रकाश भुजेल र ३० वर्षीय दोर्जे भन्ने अशोक भुजेल थिए।
उनीहरूको समूहले २०८२ पुस १५ गते ओखलढुंगा चिशंखुगढी गाउँपालिका-६ का ६० वर्षीय शोभितमान थापा र श्रीमती ६० वर्षीय रत्नमाया थापा मगरलाई धारिलो हतियार प्रहार गरेर वीभत्स हत्या गरेका थिए।
उनीहरूको हत्या गरेर अन्दाजी १ लाख नगद तथा गहन समेत लुटेको प्रहरीको आरोप छ।
सोही समूहले २०८२ असोज २६ गते ओखलढुंगा सिद्धिचरण नगरपालिका-४ को ५२ वर्षीया रत्नकुमारी कटवाललाई बञ्चरो प्रहार गरी हत्या गरेका थिए। हत्या पछि गहना र नगद लुटपाट गरेको आरोप थियो।
उनीहरूले हत्या गर्नका लागि प्रयोग गरेको बञ्चरो, खुकुरी, गहना गालेर बनाइएको रिंग, बन्दुक, कोदालो, मोवाइल लगायतका सामान प्रहरीले बरामद गरेको थियो।
तर गिरोह नै समातिएको दाबी गरेपछि पनि अर्को दम्पतीको हत्या भएको घटना बाहिरिएपछि थप रहस्यमय बनेको छ।
‘त्यतिबेला हामीले गिरोहलाई प्रमाणसहित समातेका थियौं। अहिलेको घटना र त्यतिबेलाको घटना सम्बन्धित छ/छैन भन्ने अनुसन्धानबाट थाहा होला,’ प्रहरी निरीक्षक भट्टराईले भने।
-1746009348.jpg)
