राष्ट्रिय स्वतन्त्र पार्टीका वरिष्ठ नेता बालेन शाहसँगै सुदूरपश्चिमको भ्रमणमा रहेका एक युवा अछाममा बिरामी परेपछि काठमाडौं ल्याएर उपचार गरिएको छ।
उनको धापासीको ग्रान्डी अस्पतालमा उपचार जारी रहेको अस्पतालले जनाएको छ।
उनलाई इमर्जेन्सीमा नसा र मुटुका चिकित्सकले हेरिरहेका छन्। उनलाई ब्रेन ह्यामरेज भएकाले भेन्टिलेटरमा राखेर आइसियुमा उपचार भइरहेको अस्पताल स्रोतले जनायो।
शाहसँगै सुदूरपश्चिम भ्रमणमा रहेका नुवाकोटका ४३ वर्षीय दिनेश सिटौला शुक्रबार बिहान पौने १० बजेतिर एकाएक लडेका थिए। उनी चलचित्र पत्रकार संघका निवर्तमान अध्यक्ष समेत हुन्।
अछामका प्रहरी प्रमुख डिएसपी ओमप्रसाद खनालका अनुसार गाडीबाट ओर्लने क्रममा बिहान सिटौला एकाएक लडेर बेहोस भएका थिए।
बिरामी सिटौलालाई नेपाली सेनाको हेलिकप्टरलाई उद्धार गरी काठमाडौं ल्याइएको हो।
'घाइतेलाई अछामबाट हेलिकप्टरमा सुर्खेत र सुर्खेतबाट नेपाली सेनाको स्काई ट्रकबाट काठमाडौं ल्याइएको हो,'अस्पताल स्रोतले भन्यो,'स्वास्थ्य अवस्था अलि जटिल छ।घाइतेको होस छैन। अब एमआराई सिटी स्क्यान गरेपछी थप जानकारी आउछ होला।'
चुनावी माहोल बनाउन रास्वपाका वरिष्ठ नेता केही दिन पहिले मात्रै पहिलो पटक सुदूरपश्चिमको भ्रमणमा टिमसहित पुगेका थिए।
-1746009348.jpg)
