शीर्ष राजनीतिक नेताहरूको नाम दुरूपयोग गरी रकम असुली गरेको आरोपमा अध्यागमन विभागले एक जना अमेरिकी नागरिकलाई पक्राउ गरेको छ।
नेपाल इन्टरनेशनल कलेजको नाममा उनले अन्तर्राष्ट्रिय स्तरमा रकम उठाउने गरेको विभागले जनाएको छ।
रकम असुलीका लागि उनले नेकपा एमालेका अध्यक्ष केपी शर्मा ओली, नेपाली कांग्रेसका सभापति गगन थापा, पूर्वमन्त्री आरजु राणा देउवा, एमाले सचिव महेश बस्नेत लगायतका १३ जनाको नाम टिममा राखेको आरोप छ।
पक्राउ परेका अमेरिकी नागरिकको नाम सार्वजनिक गरिएको छैन।
उनले रकम उठाउन राजनीतिक व्यक्तित्वको नाम दुरूपयोग गरेको थाहा पाएपछि नियन्त्रणमा लिइएको विभागका प्रवक्ता टिकाराम ढकालले जानकारी दिए।
उनकाअनुसार लाइब्रेरी, क्याम्पस सर्भिस तथा प्रशासनिक टिम भनेर अन्य प्रतिष्ठित नेपालीको समेत नाम उल्लेख गरेका थिए।
उनले भनेको कलेजले कोरियन, एआई सफ्टवेयर इन्जिनियरिङ, बिजनेस् स्टडिज आदि पढाउने दाबी गरिएको थियो।
‘सन् २०१४ देखि विभिन्न प्रयोजनका लागि नेपाल आवतजावत गरेका उनले करिब १२ वर्षको अवधिमा ५० भन्दा बढी पटक नेपाल भ्रमण गरेका छन्,’ ढकालले भने।
उनले सञ्चालन गरेको भनिएको कलेज त्रिभुवन विश्वविद्यालय र पोखरा विश्वविद्यालयबाट सम्बन्धन प्राप्त कलेज भनेर प्रचार गरेको पाइएको छ। तर आधिकारिक प्रमाण पेस गर्न नसकेको एउटै कलेजले दुई विश्वविद्यालयसँग सम्बन्धन प्राप्त गर्न नसक्ने पनि ढकालले बताए।
-1746009348.jpg)
