भदौ २३ गते बिहान झन्डै सात बजे बजेको थियो। कट्टी खोला तर्ने क्रममा त्यहाँका स्थानीयले झोलुंगे पुलमुनि एक नग्न शव बगिरहेको देखे।
स्थानीयहरूले प्रहरीलाई खबर गरे। उक्त शव २२ वर्षीय गोविन्द विकको थियो।
गोविन्दको शरीरभरि निलडाम र गहिरा घाउ थिए। तर वरिपरि रगतको दाग थिएन।
घटनास्थलमा पुगेपछि प्रहरीलाई दृश्य शंकास्पद लागेको दैलेखका प्रहरी प्रमुख डिएसपी गणेशबहादुर बरालले बताए।
उनका अनुसार यो दुर्घटना नभई योजनाबद्ध हत्या भएको प्रहरीको प्रारम्भिक अनुमान थियो।
मृतकको शरीरमा कपडा थिएन। खोलामा बगाएर प्रमाण मेटाउने प्रयास गरिएको अनुमान भयो। त्यही दिन गोविन्दका बुवा अमृत विकले ज्यान सम्बन्धी कसुरमा कसैको नाम उल्लेख नगरी जाहेरी दिए।
प्रहरीले घटनाबारे अनुसन्धान गर्न धेरै जना गाउँलेसँग सोधपुछ गर्दा पनि कुनै सुराक भेटिएको थिएन। जसले गर्दा घटना झन् रहस्यमय बन्दै गइरहेको थियो।
झन्डै चार महिनापछि भने अनुसन्धान अगाडि बढ्यो।
घटना भएको रात चिच्याएको आवाज सुनेको एक स्थानीयले प्रहरीलाई सूचना दिए। प्रहरीले फेरि सोधपुछ गर्न थाल्यो। सोही क्रममा एक किशोरले सबै कुरा प्रहरीलाई विस्तृत रूपमा बताए।
त्यहीँबाट गोविन्दको योजनाबद्ध हत्या भएको तथ्य बाहिरिएको डिएसपी बरालले बताए।
'गोविन्दको हत्या आरोपीकी दिदीसँगको सम्बन्धका कारण भएको थियो,' उनले भने।
प्रहरीले यस घटनामा संलग्न ५ नाबालकसहित सात जनालाई पक्राउ गरेको छ।
प्रहरीले मुख्य योजनाकार १७ वर्षीय किशोर–क (सांकेतिक नाम) र उनकी २५ वर्षीया दिदी युवती–क (सांकेतिक नाम) लाई पक्राउ गरेको छ। नाबालक भाइको परिचय खुल्ने भएकाले दिदीको परिचय पनि गोप्य राखिएको हो।
यस्तै पक्राउ पर्नेहरूमा एक जना १५ वर्षीय, एक जना १६ वर्षीय, दुई जना १७ वर्षीय किशोर र एक जना १९ वर्षीय युवक छन्।
डिएसपी बरालका अनुसार मृतक गोविन्दको युवती–कसँग प्रेम सम्बन्ध थियो। युवती–क विवाहित भए पनि उनका श्रीमान वैदेशिक रोजगारीमा भएकाले माइतीमै बस्दै आएकी थिइन्।
'गोविन्द र दिदीको सम्बन्ध भाइ किशोर–कलाई मनपरेको रहेनछ,' उनले भने, 'त्यसैले उनले साथीहरूलाई भेला पारेर हत्या योजना बनाएका रहेछन्।'
भदौ २२ गते राति गोविन्द युवती–कको कोठामा आएका बेला किशोरहरूले निर्मम तरिकाले कुटपिट गरे। त्यसपछि गम्भीर चोटपटकका कारण गोविन्दको कोठामै मृत्यु भएको डिएसपी बरालले बताए।
त्यसपछि उनीहरूले शवबाट कपडा निकाली बोरामा हालेर राति नै झन्डै तीन सय मिटर टाढा कट्टी खोलामा लगेर फालेका थिए।
उनीहरूले घटनास्थलको प्रमाण नष्ट गर्न राति नै कोठा लिपपोत समेत गरेका थिए। गोविन्दका जुत्ता र लुगाफाटा जंगलमा फालेका थिए।
गोविन्दको हत्यापछि किशोर–क र उनकी दिदी युवती–क भारत समेत पुगेको प्रहरीले बताएको छ।
सातै जनाविरूद्ध कर्तव्य ज्यान मुद्दामा जन्मकैद सजायको माग गर्दै जिल्ला सरकारी वकिल कार्यालय, दैलेखमा अभियोजन प्रक्रिया अघि बढाइएको प्रहरीले जनाएको छ।
-1746009348.jpg)
