राष्ट्रिय स्वतन्त्र पार्टी (रास्वपा) का उम्मेदवारले प्रयोग गर्ने गरेको कारले ठक्कर दिँदा रौतहटमा ४ वर्षीया बालिकाको मृत्यु भएपछि अहिले आलोचना भइरहेको छ।
बिहीबार दिउँसो साढे २ बजे इशनाथ नगरपालिका वडा नम्बर ४ मठिया टोलमा बा १५ च ४२४४ नम्बरको कारले ४ वर्षकी अल्फा खातुनलाई ठक्कर दिएको थियो।
दुर्घटना हुँदा उक्त कारमा रौतहट क्षेत्र नम्बर २ का रास्वपा उम्मेदवार शेख सगिर रहेको दाबी भइरहेको छ।
गाडीमा रास्वपाकै उम्मेदवारको तस्बिर रहेको स्टिकर र रास्वपाको झण्डा राख्न अगाडि लठ्ठीसमेत राखिएको थियो।
सामाजिक सञ्जालमा सार्वजनिक भएको दुर्घटनाको भिडिओमा बालिका अल्फा खातुनले बाटो काट्न खोजेको देखिन्छ।
सानो सडकमा कारको गति पनि धेरै नभएको देखिन्छ। गाडीको अघिल्लो भागले ठक्कर दिएपछि ढलेकी बालिकालाई पछाडिको पांग्राले पनि किचेको फुटेजमा देखिन्छ।
त्यसपछि आसपासका स्थानीय तत्कालै जम्मा भएको सिसिटिभी फुटेजमा देखिन्छ। गाडीमा रास्वपाका उम्मेदवार थिए कि थिएनन् भन्ने प्रश्न उठेको छ।
जिल्ला प्रहरी कार्यालय रौतहटका डिएसपी विष्णु प्रदीप बस्यालका अनुसार दुर्घटनापछि चालक, आफन्तले बालिकालाई गाडीमा राखेर गौर सिटी अस्पतालमा पुर्याएका थिए। तर बालिकाको ज्यान गएपछि भने चालक त्यहाँबाट सम्पर्कविहीन भएका थिए।
चालक परोहा नगरपालिका घर भएका २७ वर्षीय शेख मुस्ताख हुन्। उनलाई प्रहरीले बिहीबार नै नियन्त्रणमा लिइसकेको छ।
डिएसपी बस्यालले उक्त गाडीमा उम्मेदवार नरहेको पाइएको बताएका छन्। ‘उम्मेदवार त्यही ठाउँको घरदैलोमा हुनुहुन्थ्यो भन्ने जानकारी आएको छ, दुर्घटना हुँदा गाडिभित्रै उम्मेदवार हुनुहुन्थेन,’ उनले भने।
हामीले डिएसपी बस्याललाई प्रश्न गर्यौं- परिवारले उम्मेदवार त्यही गाडीमा सवार थिए भन्ने दाबी गरेका छन् नि!
जबाफमा उनले भने, ‘त्यसो होइन, दुर्घटना भएपछि मृतकको आमा, छरछिमेकहरू बसेर चालकले त्यसैमा घाइतेलाई अस्पताल पुर्याएको हो तर अस्पताल पुर्याएपछि आत्तिएर चालक भागेको भनेका छन्।’
दुर्घटनाका विषयमा रास्वपाका उम्मेदवारलाई पनि हामीले सोधेका छौं।
उनले उक्त गाडी आफ्नै नाममा रहेको बताए। तर दुर्घटनाका बेला आफू गाडीमा नभएको उनले बताए।
‘त्यो मैले नै प्रयोग गर्ने गाडी हो, मेरै नाममा छ। हामीसँग अर्को एउटा गाडी पनि थियो। घरदैलो कार्यक्रममा इशनाथ-४ मठिया टोलमा पुगेका थियौं। गाडी साइड लगाएर हामी समाजका मानिससँग गाउँ घुमिरहेका थियौं,’ उनले भने, ‘ चालकले गाडी सार्न लाग्यो वा कतै जाँदै थियो होला। त्यही क्रममा घटना भएको हो। उसले पनि हेर्न सकेन। तर म थिइनँ। गाउँ समाजमा बुझ्दा पनि हुन्छ।’
दुर्घटना भएपछि पनि चालकले नै घाइते बालिकालाई गाडीमा राखेर अस्पताल पुर्याएको उनले बताए। तर त्यसपछि चालकले मोबाइल अफ गरेको पनि उनको भनाइ छ।
‘सवारी चालक अनुमति पत्र (लाइसेन्स) भएकै चालक हो। दुर्घटनापछि केही समय मोबाइल अफ गरेछन्। पछि प्रहरीकहाँ उपस्थित गराइदेऊ भनेपछि ढिला गरी प्रहरीकहाँ पुगेका हुन्,’ उनले भने।
चालकले प्रहरीसँग बालिका एक्कासि सडकमा आउँदा नदेखेको प्रारम्भिक बयान दिएका छन्।
प्रहरीले घटनाको अनुसन्धान प्रक्रिया अघि बढाएको छ।
-1746009348.jpg)
