नेपाल पर्यटन बोर्डको आयोजनामा ललितपुरको पर्यटकीय क्षेत्र कोन्ज्योसोम भारदेउको सौन्दर्य झल्काउने फोटो प्रदर्शनी सुरू भएको छ।
बोर्डको नियमित कार्यक्रम '#photoNepal' अभियान अन्तर्गत यो प्रदर्शनी भएको हो।
शुक्रबारदेखि सुरू भएको प्रदर्शनी माघ २५ सम्म भृकुटीमण्डपस्थित पर्यटन बोर्डको परिसरमा चल्ने प्रदर्शनीमा कोन्ज्योसोम क्षेत्रका प्राकृतिक दृश्य, संस्कृति र जनजीवनलाई समेटिएका तस्बिरहरू राखिएको छ।
ललितपुरको दक्षिणी भेगमा रहेका हरियाली डाँडाकाँडा, कलात्मक खेतीपाती गरिएका गराहरू र त्यहाँबाट देखिने हिमालको मनोरम दृश्यहरू मुख्य आकर्षणका रूपमा रहेका छन्। यसका साथै स्थानीय बासिन्दाको परम्परागत पहिरन, संगीत र धार्मिक स्थलहरूको झलक पनि तस्बिर मार्फत देखाइएको नेपाल पर्यटन बोर्डले जनाएको छ।
ओझेलमा परेका पर्यटकीय गन्तव्यहरूको प्रचार-प्रसार गर्ने उद्देश्यले आयोजना गरिएको यस प्रदर्शनीले आन्तरिक तथा बाह्य पर्यटकलाई कोन्ज्योसोम भारदेउ भ्रमण गर्न प्रेरित गर्ने विश्वास लिइएको छ। यो कार्यक्रम कोन्ज्योसोम गाउँपालिकासँगको सहकार्यमा भएको हो।
-1746009348.jpg)
