प्रमुख विपक्षी दल नेपाली कांग्रेसको भ्रातृसंस्था नेपाल तरूण दलले प्रधानमन्त्री बालेन शाहले दिएको सीमा सम्बन्धी अभिव्यक्ति विरूद्ध प्रदर्शन गरेको छ।
तरूण दलले सोमबार माइतीघरमा प्रदर्शन गरेको हो।
प्रधानमन्त्री शाहले आइतबार प्रतिनिधि सभाको बैठकमा नेपालले भारतको भूमि मिचेको अभिव्यक्ति दिएका थिए।
सो अभिव्यक्ति गैरजिम्मेवारपूर्ण रहेको भन्दै तरूण दलले खबरदारी गरेको हो।
प्रदर्शनमा सहभागीहरूले ‘नेपालको भुइँ प्यारो छ, हलुका टिप्पणी अक्षम्य छ!’, ‘कार्यकारी प्रमुख हो कि देशकै बोझ?’, ‘सस्तो गफ बन्द गर, राष्ट्रियताको रक्षा गर!’, ‘देशको सीमा र स्वाभिमान, हाम्रो प्राण!’, ‘फरक छ नि प्र.म ज्यू, कूटनीति र डोजर नीतिमा’, ‘पिएम बालेन राष्ट्रप्रेम स्टाटसमा होइन, व्यवहारमा देखाऊ’, ‘र्याप र जोकतन्त्र होइन, लोकतन्त्र! एल्गोरिदमले धान्दैन शासनतन्त्र!! सामान्यज्ञान पढ्नुस् प्रधानमन्त्रीज्यू!, राष्ट्रिय स्वाधीनताको रक्षा गरौँ लगायत लेखिएका प्ले कार्ड बोकेका थिए। –न्युज एजेन्सी नेपाल
