केन्द्रीय अनुसन्धान ब्युरो (सिआइबी) ले फेक रेस्क्यू प्रकरणमा प्रतिवादी रहेका ३३ जनामाथि सम्पत्ति शुद्धीकरणको कसुरमा अनुसन्धान थालेको छ।
पर्वतारोहणमा गएका पर्यटकलाई बिरामी परेको भनेर नक्कली उद्धार गरी बीमा असुली गरेको घटनाअन्तर्गत सिआइबीले सम्पत्ति शुद्धीकरण कसुरमा दोस्रो चरणको अनुसन्धान थालेको हो।
सिआइबीले ३३ जना प्रतिवादीविरूद्ध नै सम्पत्ति शुद्धीकरण कसुरमा अनुसन्धान थालेको एआइजी मनोजकुमार केसीले जानकारी दिए।
'पहिलो चरणको अनुसन्धानको मुद्दा अदालतमा चलिरहेको छ। दोस्रो चरणमा ३३ जना प्रतिवादीविरूद्ध नै सम्पत्ति शुद्धीकरण कसुरमा अनुसन्धान थालेका छौं,' उनले भने।
पहिलो चरणमा उनीहरूमाथि 'संगठित रूपले राष्ट्रहित विपरित काम गरेको' कसुरमा अनुसन्धान गरी अदालतमा मुद्दा लगिएको थियो।
सुरूमा सिआइबीले ३३ जनाविरूद्ध मुद्दा चलाउन सरकारी वकिलको कार्यालयमा सिफारिस गरेको थियो। तर सरकारी वकिलको कार्यालय काठमाडौंले ३२ जनालाई मात्र प्रतिवादी बनाएर मुद्दा चलाउने निर्णय गरी चैत ८ गते जिल्ला अदालतमा मुद्दा दर्ता गरेको थियो।
त्यसमा संलग्न रहेका हवाई विज्ञ राजेन्द्रबहादुर सिंहविरूद्ध भने मुद्दा दर्ता गरिएको थिएन।
पहिलो चरणमा चैत १९ गते पुर्पक्षका लागि सुनुवाइ गर्दै काठमाडौं जिल्ला अदालतका न्यायाधीश जगतबहादुर पौडेलको इजलासले १० जनालाई धरौटीमा छाड्न आदेश दिएको थियो।
पछि गत वैशाख ८ गते हवाई विज्ञका रूपमा रहेका राजेन्द्रबहादुर सिंहविरूद्ध पनि मुद्दा दर्ता गरियो।
सरकारी वकिलको कार्यालय काठमाडौंले सिंहविरूद्ध मुद्दा नचलाउने निर्णय गर्दा कुनै कारण देखाएको थिएन। बरू मुद्दा चलाउन आवश्यक नभएको मात्र उल्लेख गरिएको थियो।
महान्यायाधिवक्ता नारायणदत्त कँडेलको निर्देशनमा उनीमाथि अभियोजन गर्न निर्देशन भएपछि पुन: फाइल खोलेर अभियोजन अघि बढेको थियो।
उच्च सरकारी वकिल कार्यालय पाटनका सहन्यायाधिवक्ता ईश्वरीप्रसाद ढकालले चैत ८ गते भएको मुद्दा नचलाउने निर्णय बदर गरेका थिए।
सिंहले फेक रेस्क्यू प्रकरणमा तथ्य, प्रमाण लुकाउन र सिआइबीकै अनुसन्धानलाई प्रभाव पार्न खोजेको आरोप छ।
अन्य प्रतिवादीहरूले भने फेक रेस्क्यू गर्नमा विभिन्न भूमिका खेलेको सिआइबीको अनुसन्धानमा देखिएको हो। सिंहविरूद्ध मुद्दा दर्ता भएपछि अदालतबाट म्याद जारी नहुँदै उनी उपस्थित भएको स्रोतले बतायो।
'उनी अदालतमा म्याद नै जारी नभइकन उपस्थित हुन जाने वातावरण बन्यो। पछि उनी धरौटीमा छुटे,' स्रोतले भन्यो। सिंहलाई २ लाख रूपैयाँ धरौटीमा छाड्न आदेश भएको थियो।
यसमा संलग्न अन्य प्रतिवादीहरू पनि धरौटीमा छुटेका थिए। कतिपय प्रतिवादी भने फरार थिए।
एभरेस्ट एक्सपेरियन्स एन्ड एसोसिएट्स प्रालिका सञ्चालक मुक्ति पाण्डे र म्यानेजर सुभाष केसी, माउन्टेन रेस्क्यू सर्भिस प्रालिका सञ्चालक जयराम रिमाल र नेपाल चार्टर्ड सर्भिसका सञ्चालक रविन्द्र अधिकारीलाई जनही ३० लाख रूपैयाँ धरौटीमा छाडिएको थियो।
श्रृद्धि इन्टरनेसनल अस्पतालका सञ्चालक डा. गिर्वाणराज तिमिल्सिना, माउन्टेन रेस्क्यूका म्यानेजर विवेक पाण्डे, पानोरमा हिमालय ट्रेकिङ एन्ड एक्स्पिडिसनका सञ्चालक पासाङ शेर्पालाई जनही ५ लाखमा छाड्न आदेश भएको थियो।
त्यस्तै, रोयल होलिडेज एड्भेन्चर एन्ड ट्राभल कम्पनीका सञ्चालक सन्दिप तिवारी र खोमराज अधिकारीलाई जनही ५ लाख र नेपाल चार्टर्ड सर्भिसका अपरेसन म्यानेजर विवेकराज थपलियालाई एक लाख रूपैयाँ धरौटीमा छाड्न आदेश दिएको थियो।
