स्थानीय प्रशासनले सल्यानका सम्पूर्ण भित्री सडक खण्डमा शनिबार बेलुकादेखि सवारीसाधन चलाउन रोक लगाएको छ।
प्रमुख जिल्ला अधिकारी बन्दना कुमार केसीले शनिबार सार्वजनिक सूचना जारी गर्दै बेलुकी ५ बजेदेखि आइतबार बिहान ७ बजेसम्म जिल्लाका सम्पूर्ण भित्री सडकमा सवारीसाधन सञ्चालनमा रोक लगाएकी हुन्।
शुक्रबार बेलुकादेखि जारी वर्षाका कारण हुन सक्ने सम्भावित जनधनको क्षतिलाई मध्यनजर गर्दै स्थानीय प्रशासनले यस्तो निर्णय गरेको हो।
शुक्रबार सल्यानमा भएका दुई फरक दुर्घटनामा चार जनाको मृत्यु हुनुका साथै १८ जना घाइते भएपछि स्थानीय प्रशासनले सूचना जारी गरेको हो।
शुक्रबार राति पौने ९ बजेतिर जिल्लाको बनगाड कुपिण्डे नगरपालिका–११ गरास्थित खलंगा–बालुवा संग्राही सडक खण्डमा चौरबाट बालुवा संग्राहीतर्फ जाँदै गरेको रा १ च १७२३ नम्बरको डबल क्याब बोलेरो जिप सडकबाट अन्दाजी १०० मिटर तल खसेको थियो।
दुर्घटनामा घाइते भएका सुर्खेतको गुर्भाकोट नगरपालिका–२ मालारानीका २५ वर्षीय पप्पु डाँगीको मृत्यु भएको छ। सल्यानका प्रहरी प्रवक्ता प्रहरी निरीक्षक ईश्वर रोकायाका अनुसार डाँगीको सुर्खेतस्थित मेहेलकुना अस्पतालमा उपचारका क्रममा शनिबार बिहान २ बजेतिर मृत्यु भएको थियो।
यो दुर्घटनामा थप ११ जना घाइते भएका छन्। उनीहरूको विभिन्न अस्पतालमा उपचार भइरहेको छ।
गुर्भाकोट नगरपालिका–२ मालारानीकी २२ वर्षीया पुनम बुढा र सोही ठाउँका १५ वर्षीय झलक डाँगीको सल्यान र सुर्खेतमा उपचारपछि थप उपचारका लागि बाँकेको नेपालगन्जस्थित सञ्जीवनी अस्पतालमा उपचार भइरहेको छ। प्रहरीका अनुसार उनीहरूको अवस्था मध्यम छ।
त्यस्तै, सुर्खेतको भेरीगंगा नगरपालिका–६ की ३२ वर्षीया निर्मला वली, गुर्भाकोट नगरपालिका–२ मालारानीकी २५ वर्षीया हरिमाया वली र १८ वर्षीया समीक्षा वलीको नेपालगन्जस्थित सागर अस्पतालमा उपचार भइरहेको छ। उनीहरूको अवस्था पनि मध्यम रहेको प्रहरीले जनाएको छ।
गुर्भाकोट नगरपालिका–२ मालारानीका १८ वर्षीय उत्तम डाँगी र २१ वर्षीया पिमकली डाँगीको सुर्खेतस्थित माया नर्सिङ होममा उपचार भइरहेको छ। उनीहरूको अवस्था पनि मध्यम रहेको प्रहरीले जनाएको छ।
गम्भीर घाइतेमध्ये गुर्भाकोट नगरपालिका–२ मालारानीका २३ वर्षीय अम्मरबहादुर घर्तीका आफन्तसँग भने थप सम्पर्क हुन नसकेको प्रहरीले जनाएको छ। टाउको र शरीरका विभिन्न भागमा गम्भीर चोट लागेका घर्तीलाई सल्यानबाट आफन्तले सुर्खेत लगे पनि त्यसपछि सम्पर्क हुन नसकेको प्रहरीले जनाएको छ।
त्यस्तै, गुर्भाकोट नगरपालिका–२ का १५ वर्षीय तिलक वली, २६ वर्षीय क्षितिज डाँगी र १२ वर्षीया पवित्रा डाँगी भने सुर्खेतमा उपचारपछि डिस्चार्ज भइसकेका छन्।
शुक्रबार बेलुकी साढे ६ बजेतिर सल्यानको सिद्ध कुमाख गाउँपालिका–२ रातामाटे खोलास्थित भित्री कच्ची सडक खण्डमा अर्को जिप दुर्घटना भएको थियो। श्रीनगरबाट टाकुरागाउँतर्फ जाँदै गरेको लु १ ज २३६८ नम्बरको जिप सडकबाट झन्डै १५० मिटर तल खोलामा खसेको थियो।
दुर्घटनामा तीन जनाको मृत्यु भएको थियो भने सात जना घाइते भएका थिए। मृत्यु हुनेमा सिद्ध कुमाख गाउँपालिका–२ की ४२ वर्षीया कृष्णी बस्नेत, ४५ वर्षीया सीता विक र ४३ वर्षीय साउने रोका छन्। उनीहरूलाई जिल्ला अस्पताल खलंगामा सवा ८ बजेतिर जाँच गरेपछि चिकित्सकले मृत घोषणा गरेका थिए।
सल्यानका प्रहरी निरीक्षक रोकायाका अनुसार दुर्घटनाका गम्भीर घाइतेमध्ये चार जनालाई सल्यान र बाँकेमा उपचारपछि थप उपचारका लागि भारतको लखनउ रिफर गरिएको छ।
रिफर हुनेमा सिद्ध कुमाख गाउँपालिका–२ का २४ वर्षीय देवबहादुर विक, ५८ वर्षीया सुशीला चलाउने, सिद्ध कुमाख–३ का १५ वर्षीय कमल बुढाथोकी र सिद्ध कुमाख–२ का १० वर्षीय युवराज परियार छन्। उनीहरूलाई सल्यानस्थित कर्णाली केयर अस्पताल श्रीनगरमा प्रारम्भिक उपचारपछि थप उपचारका लागि बाँकेको नेपालगन्जस्थित सञ्जीवनी कलेज अफ मेडिकल साइन्सेस प्रालिमा पठाइएको थियो। त्यहाँ पनि उपचार सम्भव नभएपछि शनिबार बिहान साढे ६ बजेपछि चारै जनालाई लखनउ रिफर गरिएको प्रहरीले जनाएको छ।
घाइतेमध्ये सिद्ध कुमाख–३ की सात वर्षीया बिमला बुढाथोकी र सिद्ध कुमाख–२ का २२ वर्षीय दीपक रोकाको सञ्जीवनी अस्पतालमै उपचार भइरहेको छ।
प्रहरी निरीक्षक रोकायाका अनुसार सिद्ध कुमाख–२ की १३ वर्षीया राधिका चलाउनेको भने सल्यानको श्रीनगरस्थित शारदा मेट्रो अस्पतालमा उपचार भइरहेको छ। उनको टाउको, बायाँ कान र ढाडमा चोट लागेको छ।
जिप चालक सिद्ध कुमाख–२ का ३८ वर्षीय तिलक चलाउनेलाई प्रहरीले घटनाकै राति नियन्त्रणमा लिएको थियो। चालक चलाउनेको अवस्था सामान्य रहेको प्रहरीले जनाएको छ।
