प्रधानमन्त्री कप एकदिवसीय राष्ट्रिय क्रिकेट प्रतियोगितामा विभागीय टोलीद्वय त्रिभुवन आर्मी र नेपाल पुलिस क्लबले दोस्रो जित निकालेका छन्।
आर्मीले लगातार दोस्रो जित हात पार्ने क्रममा बिहीबार तल्लो मुलपानी मैदानमा भएको खेलमा गण्डकी प्रदेशलाई ७ विकेटले पराजित गर्यो।
गण्डकीले दिएको २१० रनको लक्ष्य आर्मीले ३४ ओभरमा ३ विकेटको क्षतिमा पूरा गर्यो। आर्मीको जितमा तृतराज दासले ५१ रन, कप्तान विनोद भण्डारीले ५८ रन र भीम सार्कीले नटआउट ५४ रन बनाए।
त्यसअघि गण्डकीले २ बल खेल्न बाँकी छदा अलआउट हुनुअघि अर्जुन कुमालले ६७ रन र दीपक डुम्रेले ५१ रनको मद्दतमा २०९ रन बनाएको थियो। बलिङमा आर्मीका आकाश चन्द र साहब अलामले ३-३ विकेट लिए।
गण्डकी भने लगातार दोस्रो खेलमा पराजित भयो।
यता नेपाल पुलिस क्लबले तेस्रो खेलमा दोस्रो जित निकाल्ने क्रममा माथिल्लो मुलपानी मैदानमा भएको खेलमा शंकर रानाको शतकको मद्दतमा बागमती प्रदेशलाई ७ विकेटले पराजित गर्यो।
शंकरले १२८ बलमा ११६ रन बनाएपछि पुलिसले बागमतीले दिएको २६६ रनको लक्ष्य ४४ ओभरमा ३ विकेटको क्षतिमा पूरा गर्यो।
त्यसअघि ओपनर दिनेश खरेलले ७० रनको योगदान गर्दा कप्तान आरिफ शेखले नटआउट ४३ जोडे।
टस जितेर पहिले ब्याटिङ गरेको बागमती चार बल खेल्न बाँकी छदा २६५ रनमा अलआउट भयो। बागमतीका लागि मध्यक्रमका ब्याटरद्वय इशान पाण्डेले ७० रन र पवन थापाले ७९ रन बनाएका थिए।
बलिङमा पुलिसका रशिद खान र दिनेश खरेलले ३-३ विकेट लिए। बागमती तीनमध्ये दुई खेलमा पराजित भइसकेको छ।
