भारतका दिग्गज स्पिनर रविचन्द्रन अश्विन अमेरिकामा हुने 'मेजर लिग क्रिकेट' को चौथो सिजनका लागि 'सन फ्रान्सिस्को युनिकर्न्स' टोलीसँग अनुबन्धित भएका छन्। योसँगै उनी यस प्रतियोगितामा सहभागी हुने पहिलो पूर्व भारतीय अन्तर्राष्ट्रिय खेलाडी बनेका छन्।
अश्विनले डिसेम्बर २०२४ मा अन्तर्राष्ट्रिय क्रिकेटबाट र २०२५ को आईपीएल सिजनपछि आईपीएलबाट पनि सन्यास लिएका थिए। उनले चेन्नई सुपर किंग्सबाट आफ्नो अन्तिम आईपीएल सिजन खेलेका थिए। हालै अमेरिकाको डल्लासमा भएको एक प्रदर्शनी खेलमा दर्शकहरूको उत्साह देखेर उनी प्रभावित भएका थिए।
अश्विनले भने, ‘डल्लासको खेलमा एसियाली मूलका मानिसहरूको उपस्थिति र क्रिकेटप्रतिको माया देख्दा अमेरिकामा क्रिकेटको भविष्य कति राम्रो छ भन्ने प्रस्ट भयो। म यस नयाँ यात्राका लागि निकै उत्साहित छु।’
आईपीएल बाहेक अश्विनले खेल्न लागेको यो पहिलो विदेशी टी-२० लिग हो। यसअघि उनले अस्ट्रेलियाको बिग ब्यास लिग खेल्ने तयारी गरे पनि चोटका कारण खेल्न पाएका थिएनन्। २०२८ को लस एन्जलस ओलम्पिकमा क्रिकेट समावेश हुन लागेको सन्दर्भमा अमेरिकाले क्रिकेटमा ठूलो लगानी गरिरहेको छ।
मेजर लिग क्रिकेटका प्रमुख कार्यकारी अधिकारीजोनी ग्रेभले अश्विन जस्तो स्तरको खेलाडी आउनु लिगको लागि ठूलो उपलब्धि भएको बताएका छन्। यो लिग सन् २०२३ मा सुरु भएको थियो र छोटो समयमै यसले विश्वको ध्यान खिच्न सफल भएको छ।
अमेरिकाको यस लिगमा सहभागी ६ मध्ये ३ वटा टोलीहरू आईपीएलकै मालिकहरूका हुन्:
१. एमआई न्यूयोर्क (मुम्बई इन्डियन्स)
२. टेक्सस सुपर किंग्स (चेन्नई सुपर किंग्स)
३. एलए नाइट राइडर्स (कोलकाता नाइट राइडर्स)
यसका साथै राजस्थान रोयल्सको स्वामित्व पनि हालै अमेरिकामा आधारित लगानीकर्ताहरूले खरिद गरेका छन्, जसले अमेरिकामा क्रिकेटको बढ्दो प्रभावलाई देखाउँछ।
सन् २०२६ को 'मेजर लिग क्रिकेट' जुन १८ देखि सुरु हुनेछ। खेलहरू टेक्सस, लस एन्जलस र ओकल्याण्डमा खेलाइनेछन्। प्रतियोगिताको फाइनल खेल जुलाई १८ मा ओकल्याण्डमा हुनेछ।
सन फ्रान्सिस्को युनिकन्र्सले अहिलेसम्म एमएलसीको उपाधि जित्न सकेको छैन। सन् २०२४ मा उनीहरू उपविजेता बनेका थिए। अब अश्विनको आगमनले टोलीलाई थप बलियो बनाउने अपेक्षा गरिएको छ।
