आइतबार राति वानखेडे स्टेडियममा भएको आईपीएल २०२६ को खेलमा मुम्बई इन्डियन्स र कोलकाता नाइट राइडर्सबीच कुल ४४४ रन बन्यो। जसमा मुम्बई ६ विकेटले विजयी भयो।
१. मुम्बईको ऐतिहासिक लक्ष्य पार (२२१ रन)
मुम्बई इन्डियन्सले २२१ रनको विशाल लक्ष्य सफलतापूर्वक पूरा गर्यो। यो मुम्बईको इतिहासकै सबैभन्दा ठूलो 'चेज' हो। यसअघि सन् २०२१ मा चेन्नई विरुद्ध २१९ रन पछ्याएको मुम्बईको रेकर्ड थियो। साथै, वानखेडे स्टेडियममा कुनै पनि टोलीले पछ्याएको यो अहिलेसम्मकै सबैभन्दा ठूलो स्कोर हो।
२. १४ वर्षपछिको पहिलो जित
मुम्बई इन्डियन्सले आईपीएल सिजनको आफ्नो पहिलो खेल जितेको यो १४ वर्षपछिको पहिलो पटक हो। सन् २०१२ मा चेन्नईलाई हराएपछि मुम्बईले लगातार १३ सिजनसम्म आफ्नो पहिलो खेल हारेको थियो। १९ सिजनको आईपीएल इतिहासमा मुम्बईले पहिलो खेल जितेको यो पाँचौँ पटक मात्र हो।
३. रोहित शर्माको सबैभन्दा छिटो अर्धशतक
रोहित शर्माले मात्र २३ बलमा आफ्नो अर्धशतक पूरा गरे। आईपीएलमा उनका ५० वटा अर्धशतक मध्ये यो सबैभन्दा तीव्र हो। यसअघि उनले २०१५ को फाइनलमा चेन्नई विरुद्ध २५ बलमा अर्धशतक बनाएका थिए। साथै, १९ वर्षको आईपीएल करियरमा रोहितले सिजनको पहिलो खेलमै अर्धशतक बनाएको यो दोस्रो पटक मात्र हो।
४. विराट कोहलीको रेकर्ड तोडियो (११६१ रन)
रोहित शर्माले कोलकाताविरुद्ध कुल ११६१ रन बनाएका छन्। यो आईपीएलमा कुनै पनि एक टोली विरुद्ध कुनै ब्याटरले बनाएको सबैभन्दा धेरै रन हो। यसअघि विराट कोहलीको नाममा पञ्जाब विरुद्ध ११५९ रनको रेकर्ड थियो।
५. उत्कृष्ट ओपनिङ साझेदारी (१४८ रन)
रायन रिकेल्टन र रोहित शर्माबीच १४८ रनको साझेदारी भयो। यो मुम्बई इन्डियन्सको लागि आईपीएल इतिहासकै दोस्रो ठूलो ओपनिङ साझेदारी र वानखेडे स्टेडियममा भएको सबैभन्दा ठूलो साझेदारी हो।
६. वरुण चक्रवर्तीमाथि रोहितको दबदबा
रोहितले वरुण चक्रवर्तीको ११ बलमा २३ रन प्रहार गरे। वरुणका लागि यो खेल बिर्सनलायक रह्यो। पछिल्ला ६ खेलमा उनको बलिङ औसत ११.८६ रहेको छ, जुन स्पिनरको लागि निकै खराब प्रदर्शन हो।
७. शार्दुल ठाकुरको सफल डेब्यू (३ विकेट)
मुम्बईका लागि पहिलो खेल खेलिरहेका शार्दुल ठाकुरले कोलकाताका सुरुवाती ३ विकेट लिए। उनले कोलकाताका तीनवटा महत्वपूर्ण साझेदारीहरू (६९, ४० र ३६ रन) तोडेर मुम्बईलाई खेलमा फर्काए। आईपीएल इतिहासमा एकै खेलमा ३५ रनभन्दा माथिका तीनवटा साझेदारी तोड्ने उनी चौथो बलर बनेका छन्।
