पाकिस्तान सुपर लिग (पिएसएल) टिम लाहोर कलन्दर्सले आफ्ना कप्तान शाहीन शाह अफ्रिदीलाई सुरक्षा प्रोटोकल (नियम) उल्लंघन गरेको आरोपमा १० लाख पाकिस्तानी रुपैयाँ (करिब ३६०० अमेरिकी डलर) जरिवाना गरेको छ।
पन्जाब प्रहरीले अफ्रिदीले टिम बसेको होटलमा सुरक्षा नियम तोडेको उजुरी गरेपछि कलन्दर्सले ‘अनुशासन र जवाफदेहिता’ कायम राख्न यो कारबाही गरेको हो।
पन्जाब प्रहरीले पाकिस्तान क्रिकेट बोर्ड (पिसिबी) लाई पठाएको पत्र अनुसार शाहीन अफ्रिदी र अर्का खेलाडी सिकन्दर राजाले अनुमति बिना नै केही पाहुनालाई होटलको कोठामा लगेका थिए।
पिसिबीको सुरक्षा टोली र एन्टी-करप्सन म्यानेजरले पाहुना भेट्न अनुमति नदिएता पनि उनीहरूले पाहुनालाई कोठामा लगेको आरोप छ। प्रहरीका अनुसार ती पाहुनाहरू करिब ३ घण्टा कोठामा बसेका थिए, तर सिकन्दर राजाले भने उनीहरू ४० मिनेट मात्र बसेको दाबी गरेका छन्।
यस घटनामा सिकन्दर राजाको पनि नाम जोडिएको भए तापनि उनीमाथि भने कुनै कारबाही गरिएको छैन। राजाले एक पत्रकार सम्मेलनमा यस घटनाको जिम्मेवारी लिँदै यसमा अफ्रिदीको कुनै गल्ती नभएको र आफू दोषी रहेको बताएका थिए।
लाहोर कलन्दर्सले यो घटना जानाजानी नभई गलत बुझाइका कारण भएको बताएको छ। टिमका अनुसार यो विषयलाई सार्वजनिक रूपमा अलि बढी नै बढाइचढाइ गरिएको छ। यद्यपि, भविष्यमा यस्ता गल्ती नदोहोरियोस् भन्नका लागि र सुरक्षा नियमहरू को पूर्ण पालना गराउन जरिवाना गरिएको टोलीले स्पष्ट पारेको छ।
