प्रधानमन्त्री कप एकदिवसीय राष्ट्रिय क्रिकेट प्रतियोगितामा लुम्बिनी प्रदेशले सशस्त्र प्रहरी बलको नेपाल एपिएफ क्लबलाई सुपर ओभरमा पराजित गरेको छ।
लुम्बिनीले प्रतियोगितामा पहिलो जित निकालेको हो।
वीरगञ्जमा दुवै टोलीले १२४-१२४ रन बनाएपछि भएको सुपर ओभरमा पहिले ब्याटिङ गरेको लुम्बिनीले १४ रन बनायो। जवाफी ब्याटिङ गरेको एपिएफले ६ रन मात्र जोड्न सक्यो।
लुम्बिनीका लागि सुपर ओभरमा सन्तोष यादवले उत्कृष्ट बलिङ गर्दा रोहित पौडेल, लोकेश बम र सन्दीप जोरा सफल भएनन्।
त्यसअघि पहिले ब्याटिङ गरेको एपिएफ १२४ रनमा अलआउट भयो। उसका लागि अभिषेस गौतमले सर्वाधिक २८ रन बनाए। बलिङमा लुम्बिनीका अजय चौहानले ४ विकेट र सन्तोष यादवले ३ विकेट लिए।
१२५ रनको लक्ष्य पछ्याएको लुम्बिनीले पनि १२४ रन बनाउँदा सबै विकेट गुमायो। उसका लालगि कप्तान देव खनालले ४५ रन बनाए।
