इङ्ल्यान्डका स्टार ब्याटर ह्यारी ब्रुक र युवा खेलाडी ज्याकोब बेथेललाई 'क्रिकेट रेगुलेटर' (इङ्ल्यान्डको क्रिकेट अनुशासन हेर्ने स्वतन्त्र निकाय) ले कडा चेतावनी दिएको छ।
गत वर्ष न्युजिल्याण्डको वेलिंग्टनमा भएको एक रात्रिकालीन घटनाका कारण उनीहरूलाई यो कारबाही गरिएको हो।
गत नोभेम्बर १ मा न्युजिल्याण्ड विरुद्धको एकदिवसीय खेल हुनुभन्दा अघिल्लो रात ह्यारी ब्रुक रक्सी खाएर बाहिर निस्किएका थिए। एक नाइटक्लबमा छिर्न खोज्दा त्यहाँका बाउन्सरले उनलाई हिर्काएका थिए। त्यतिबेला ब्रुक इङ्ल्यान्डको एकदिवसीय टोलीका कप्तान थिए।
सुरुमा ब्रुकले आफू एक्लै भएको बताएका थिए, तर पछि उनले आफ्ना टोलीका साथीहरू ज्याकोब बेथेल र जोस टङ पनि साथमै रहेको स्वीकार गरे। उनले साथीहरूलाई बचाउनका लागि झुटो बोलेको बताएका थिए।
ब्रुक र बेथेल दुवैलाई 'काउसन नोटिस'दिइएको छ, जसको अर्थ उनीहरूलाई अबका लागि अन्तिम चेतावनी दिइएको हो।
यो चेतावनी उनीहरूको आधिकारिक रेकर्डमा आगामी ३ वर्षसम्म रहनेछ। यदि यो अवधिमा उनीहरूले पुनः गल्ती गरेमा कडा सजाय हुनेछ।
यो घटना बाहिर आएपछि इङ्ल्यान्ड क्रिकेट बोर्डले ब्रुकलाई कप्तानीबाट हटाउने विचार गरेको थियो, तर पछि गोप्य रूपमा जरिवाना मात्र गराएर छोडिएको थियो।
यस घटनामा संलग्न अर्का खेलाडी जोस टङमाथि भने कुनै थप कारबाही गरिएन।
यस घटनापछि इङ्ल्यान्ड क्रिकेट टोलीमा अनुशासन कायम राख्न राति १२ बजेपछि होटल बाहिर निस्कन नपाइने नियम लागू गरिएको छ। इङ्ल्यान्ड क्रिकेटका प्रबन्ध निर्देशक रोब कीले केही खेलाडीहरूले रक्सी खाएर गैरजिम्मेवार व्यवहार देखाएकोमा चिन्ता व्यक्त गरेका छन्।
ह्यारी ब्रुकअहिले इङ्ल्यान्डमा घरेलु क्रिकेट (काउन्टी) खेल्ने तयारीमा छन्। ज्याकोब बेथेल हाल भारतमा आइपिएल अन्तर्गत रोयल च्यालेन्जर्स बेंगलुरु टोलीमा आबद्ध छन्।
