अस्ट्रेलियन स्पिनर एडम जाम्पाले भारतीय प्रिमियर लिग (आईपीएल) भन्दा पाकिस्तान सुपर लिग (पीएसएल) आफूलाई बढी उपयुक्त लागेको बताएका छन्।
उनले हालै एक अन्तर्वार्तामा 'टी-२० लिग जति छोटो भयो, त्यति नै राम्रो हुने' धारणा राखेका छन्।
जाम्पाका अनुसार आईपीएल साढे दुई महिनासम्म चल्छ, जुन धेरै लामो हो। पीएसएल भने मे ३ मा सकिन्छ, जबकि आईपीएल मे अन्तिमसम्म जान्छ।
जाम्पा भन्छन्, ‘मलाई लाग्छ धेरैजसो विदेशी खेलाडीहरू आईपीएल अलि छोटो भइदिए हुन्थ्यो भन्ने चाहन्छन्। छोटो समय खेल्दा शरीरलाई आराम मिल्छ र अन्तर्राष्ट्रिय खेलका लागि ताजा रहन सकिन्छ।’
जाम्पाले आईपीएलमा विदेशी लेग स्पिनरहरूलाई खासै महत्त्व नदिइने बताए। भारतमा घरेलु स्पिनरहरू नै धेरै र राम्रा भएकाले टिमहरूले विदेशी कोटामा फास्ट बलर वा अलराउन्डर रोज्ने गर्छन्।
उनी भन्छन्, ‘म जस्तो शुद्ध स्पिनर, जसले ब्याटिङ गर्न सक्दैन, उसका लागि आईपीएलमा टिममा पर्न गाह्रो छ। आदिल राशिद जस्ता उत्कृष्ट स्पिनरले पनि त्यहाँ धेरै मौका पाउँदैनन्।’
पीएसएलमा उनी कराँची किंग्सका मुख्य बलर हुन् र उनले हरेक खेल खेल्न पाउँछन्। तर आईपीएलमा उनी राजस्थान रोयल्समा हुँदा युजवेन्द्र चहलपछिको विकल्पका रूपमा मात्र थिए। टिमको सन्तुलन मिलाउन उनलाई धेरैजसो बेन्चमा राखिन्थ्यो। पीएसएलमा भने उनी सबैभन्दा महँगा विदेशी बलरका रूपमा चुनिएका छन् र उत्कृष्ट प्रदर्शन (५.४१ को इकोनोमी) गरिरहेका छन्।
जाम्पा अहिले ३४ वर्षका भए। उनलाई अब आईपीएलमा खेलेर कसैलाई आफ्नो क्षमता देखाउनु वा नयाँ कन्ट्र्याक पाउनु पर्ने दबाब छैन। उनको पहिलो प्राथमिकता अस्ट्रेलियाको लागि खेल्नु हो। उनी सन् २०२८ को टी-२० विश्वकप र ओलम्पिकसम्म फिट रहेर खेल्न चाहन्छन्। त्यसैले उनले पैसाभन्दा पनि आफ्नो स्वास्थ्य र समयलाई ध्यान दिएर पीएसएल रोजेका हुन्।
जाम्पाका अनुसार आईपीएलमा उनले पीएसएलभन्दा बढी पैसा (करिब ६०% बढी) पाउने भए तापनि, कम समय खेल्न पाइने र अस्ट्रेलियाको लागि खेल्न अघि पर्याप्त आराम मिल्ने भएकाले उनले पीएसएललाई रोजेका हुन्।
उनको सरल मन्त्र छ- ‘लिग जति छोटो, त्यति नै राम्रो!’
