चिन्नास्वामी स्टेडियममा रोयल च्यालेन्जर्स बेंगलुरुले चेन्नई सुपर किंग्सविरुद्ध आइतबार निकालेको ४३ रनको ऐतिहासिक जितसँगै विभिन्न कीर्तिमान बनेका छन्।
आरसीबीले चेन्नई विरुद्ध कीर्तिमानी रनको वर्षा गर्यो। यस खेलका केही रोचक तथ्यांक यस्ता छन्।
१. आरसीबीको विशाल स्कोर
आरसीबीले चेन्नई विरुद्ध ३ विकेट गुमाएर २५० रन बनायो। यो आरसीबीको इतिहासकै तेस्रो ठूलो स्कोर हो भने चेन्नई विरुद्ध कुनै पनि टोलीले बनाएको अहिलेसम्मकै सबैभन्दा धेरै रन हो। यसअघि सन् २०१४ मा पन्जाबले २३१ रन बनाएको थियो।
२. २५० रनको कीर्तिमान
आईपीएलमा आरसीबीले तीन पटक २५० भन्दा बढी रन बनाएको छ। सनराइजर्स हैदरावाद (५ पटक) पछि यति धेरै पटक यो योगफल पार गर्ने आरसीबी दोस्रो टोली बनेको छ।
३. चेन्नई विरुद्ध लगातार चौथो जित
आरसीबीले चेन्नईलाई लगातार चौथो पटक पराजित गरेको छ। चेन्नई विरुद्ध आरसीबीले यसरी लगातार चार खेल जितेको यो पहिलो पटक हो। सन् २०२५ को सिजनमा आरसीबीले चेन्नईलाई दुवै खेलमा हराउन सफल भयो।
४. अन्तिम ओभरहरूमा रनको वर्षा
आरसीबीले इनिङ्सको अन्तिम ५ ओभरमा मात्र ९७ रन जोड्यो, जुन आईपीएल इतिहासकै दोस्रो धेरै रन हो। यस्तै, अन्तिम १० ओभरमा आरसीबीका ब्याटरहरूले १६ वटा छक्का प्रहार गर्दै १५९ रन बनाएका थिए।
५. टिम डेभिडको अविश्वसनीय पारी
१५औँ ओभरमा ब्याटिङ गर्न आएका टिम डेभिडले नटआउट ७० रन बनाए। १५औँ ओभर वा त्यसपछि आएर ७० भन्दा बढी रन बनाउने उनी विश्वकै दोस्रो ब्याटर बनेका छन्। उनले डेथ ओभर (१७-२० ओभर) मा मात्रै ६८ रन हाने, जुन आईपीएल इतिहासमै एउटा रेकर्ड हो।
६. सरफराज खानको नयाँ रेकर्ड
नम्बर ४ मा ब्याटिङ गर्न आएका सरफराज खानले पावरप्ले (सुरुवाती ६ ओभर) भित्रै ५० रन पूरा गरे। आईपीएल इतिहासमा चौथो नम्बर वा त्यसभन्दा तल ब्याटिङ गर्न आएर पावरप्लेमै अर्धशतक प्रहार गर्ने उनी पहिलो खेलाडी बनेका छन्।
७. भुवनेश्वर कुमारको २०० विकेट
अनुभवी बलर भुवनेश्वर कुमारले आईपीएलमा आफ्नो २०२ विकेट पूरा गरेका छन्। युजवेन्द्र चहलपछि आईपीएलमा २०० विकेट लिने उनी दोस्रो खेलाडी बनेका छन्।
८. छक्काको वर्षा
लक्ष्य पछ्याउने क्रममा चेन्नईका ९ जना फरक-फरक ब्याटरहरूले छक्का प्रहार गरे। टी-२० क्रिकेटको एकै इनिङ्समा ९ जना ब्याटरले छक्का हानेको यो विश्वकै पहिलो घटना हो। पूरै खेलमा दुवै टोलीका गरी कुल १४ जना ब्याटरले छक्का प्रहार गरेका थिए।
