असन्तुष्ट पक्षले बहिष्कार गर्नका बावजुत नेपाल क्रिकेट (क्यान) को बोर्ड बैठकले नेपाल प्रिमियर लिग (एनपिएल) को दोस्रो संस्करणको आय-व्यय अनुमोदन गरेको छ।
यसअघि शुक्रबारका लागि बोलाइएको बैठकमा असन्तुष्ट पक्षकले बहिष्कार गरेपछि सोमबारसम्मका लागि बैठक सारिएको थियो।
सोमबारको बैठकमा पनि क्यानको १७ सदस्यीय निर्वाचित सदस्यमध्ये ९ जनाको मात्र उपस्थिति भएको क्यान प्रवक्ता छुम्बी लामाले बताए।
बैठकमा उपाध्यक्ष रोशनसिंहसहित ८ जना निर्वाचित सदस्य अनुपस्थित थिए।
एनपिएलको हिसाब अध्ययन गरेर मात्र पास गर्ने अडान लिएका असन्तुष्ट पक्षलाई हिसाबको विवरण उपलब्ध गराइएको थिएन। जसका कारण उनीहरु अनुपस्थित भएका हुन्।
केन्द्रीय कार्यालय मुलपानीमा बसेको बैठकले क्यानको सन् २०२६ को वार्षिक कार्यक्रम तथा बजेट अनुमोदन गर्ने निर्णय गरेको छ।
साथै वार्षिक साधारण सभा वैशाख २७ र २८ गते कोशी प्रदेशको विराटनगरमा आयोजना गर्ने निर्णय गरेको छ।
यस्तै त्रिभुवन विश्वविद्यालय क्रिकेट मैदान, किर्तिपुरको करार सम्झौता अवधि समाप्त हुन लागेको र उक्त खेलमैदानलाई नेपाल सरकारले उच्च प्राथमिकतामा राख्दै अन्तर्राष्ट्रिय स्तरको सुविधा सम्पन्न क्रिकेट रंगशालाको पहिलो चरणको काम सम्पन्न भई फ्लड लाईट समेत जडान भएको र उक्त मैदान नेपाली क्रिकेट खेलको विकासको लागि त्रिभुवन विश्वविद्यालय क्रिकेट मैदानको करार सम्झौता अवधि थपका लागि तथा हाल राष्ट्रिय खेलकुद परिषद मातहत संचालनमा रहेको तल्लो मुलपानी क्रिकेट मैदान यस संघलाई हस्तान्तरण गरिदिनका लागि राष्ट्रिय खेलकुद परिषद मार्फत नेपाल सरकार समक्ष अनुरोध गर्ने निर्णय पनि गरिएको छ।
४ वर्षे पदावधि समाप्त भएका नेपाल क्रिकेट संघका २० जिल्लाहरुको कार्यकाल जेठ मसान्तसम्म थप गर्ने निर्णय गरिएको छ। जिल्लाले विराटनगरमा आयोजना गरिने वार्षिक साधारण सभा सम्पन् भए पश्चात २०८३ साल जेठ मसान्तभित्र निर्वाचन सम्पन्न गर्ने गरी मिति तय गरी यस संघमा जानकारी गराए पश्चात जेठ मसान्तभित्र अनिवार्य रुपमा निर्वाचन सम्पन्न गर्नका लागि संघबाट पत्राचार गर्ने निर्णय भएको क्यानको भनाइ छ।
नेपाल प्रिमियर लिग पहिलो र दोश्रो संस्करण सम्पन्न भएको र प्रतियोगिता संचालन गर्नका लागि केन्द्रीय कार्यसमितिले गठन गरी संघको गत वर्ष पोखरामा सम्पन्न वार्षिक साधारण सभा अनुमोदन गरेको नेपाल प्रिमियर लिग परिचालन परिषदले प्रस्तुत गरेको नेपाल प्रिमियर लिग दोश्रो संस्करणको आय व्यय विवरण अनुमोदन गर्ने निर्णय पनि क्यानले गरेको छ।
जसमा ग्रस रेभिन्यू ४७ करोड ३६ लाख भएको, खर्च २१ करोड ९६ लाख भएको र नाफा २५ करोड ३९ लाख भएको भन्दै उक्त हिसाब पनि अनुमोदन भएको छ।
आइसिसीको निर्देशन बमोजिम क्यान वार्षिक रुपमा प्राप्त हुने बजेटबाट महिला क्रिकेट खेलको विकासको लागि ५ लाख डलर लगानी गर्नुपर्ने भएको हुँदा यस वर्ष देखि समग्र महिला क्रिकेटको विकासमा ५ लाख डलर लगानीको व्यवस्था गर्ने निर्णय पनि क्यानले गरेको छ।
-ink-1753942203.jpeg)
