अस्ट्रेलियाका पूर्व ओपनर ब्याट्सम्यान डेभिड वार्नरलाई सिड्नीमा मादक पदार्थ सेवन गरी सवारी चलाएको (मापसे) आरोपमा प्रहरीले पक्राउ गरेको छ।
३९ वर्षीय वार्नरलाई सडकमा गुडिरहेको बेला प्रहरीले आकस्मिक जाँच गर्दा उनले अनुमति दिइएको भन्दा दोब्बर बढी मदिरा सेवन गरेको पाइएको थियो। उनलाई पक्राउ गरी मारुब्रा प्रहरी चौकी लगिएको थियो।
वार्नर हाल पाकिस्तान सुपर लिगमा कराँची किंग्सको कप्तानी गरिरहेका थिए। लिगको बीचमा एक हप्ताको खाली समय मिलाएर उनी व्यक्तिगत कामको सिलसिलामा अस्ट्रेलिया फर्केका थिए। सोही क्रममा उनी आइतबार सिड्नीमा पक्राउ परेका हुन्।
यो पक्राउले उनको पाकिस्तान फिर्ता हुने योजनामा कुनै अवरोध नगर्ने बुझिएको छ। कराँची किंग्सको अर्को खेल अप्रिल ९ मा छ र वार्नर सो खेलका लागि समयमै पाकिस्तान पुग्ने अपेक्षा गरिएको छ। यस सिजनमा उनको टोली कराँची किंग्सले अहिलेसम्मका सबै तीनवटै खेल जितेर उत्कृष्ट प्रदर्शन गरिरहेको छ।
वार्नर हाल निकै राम्रो लयमा छन्। उनले भर्खरै अष्ट्रेलियाको बिग ब्यास लिगमा ८६.६ को औसतमा रन बनाएका थिए भने पाकिस्तानमा पनि आफ्नो पछिल्लो खेलमा अर्धशतक प्रहार गरेका थिए।
उनलाई आगामी मे ७ तारिखमा सिड्नीको अदालतमा उपस्थित हुन भनिएको छ। पाकिस्तान सुपर लिगको फाइनल मे ३ मा हुने भएकाले अदालतको पेशीले उनको खेल तालिकालाई कुनै असर पार्ने देखिँदैन।
