प्रधानमन्त्री कप एकदिवसीय राष्ट्रिय क्रिकेट प्रतियोगितामा मधेश प्रदेश अंक तालिकाको तेस्रो स्थानमा उक्लिएको छ।
मधेशले गण्डकी प्रदेशलाई वर्षाले प्रभावित खेलमा १८ रनले हराएको हो। जितसँगै ६ खेलबाट ९ अंक जोडेको मधेश अंक तालिकाको तेस्रो स्थानमा उक्लियो।
यता गण्डकी भने ७ खेलबाट ५ अंक जोड्दै सातौ स्थानमा छ।
वीरगन्जमा भएको खेलमा ३५ ओभरमा झारिएको थियो। जसमा मधेश एक बल खेल्न बाँकी छदा १७२ रनमा अलआउट भयो। उसका लागि मयन यादवले ४३ रन र विशाल सुस्लिङले नटआउट ४० बनाए।
बलिङमा गण्डकीका अप्राजित पौडेल र सुवास भण्डारीले ३-३ विकेट लिए।
१७३ रन पछ्याएको गण्डकीले ५ विकेटको क्षतिमा ८० रन बनाउँदा फेरि वर्षाले खेल रोकियो। २२ ओभरसम्म भएको खेलमा डिएलएस मेथडमा गण्डकी पछि पर्दै पराजित भयो।
त्यतिबेलासम्म गण्डकीका अर्जुन कुमाल नटआउट ४९ रन बनाएर खेलिरहेका थिए। उनी एक रनले अर्धशतक बनाउन चुके।
