आइसिसी विश्वकप क्रिकेट लिग-२ अन्तर्गत आफ्नो आठौं त्रिकोणात्मक एकदिवसीय सिरिजमा सिरिजमा नेपालको प्रदर्शन बिर्सनलायक बनेको छ।
नेदरल्यान्ड्समा भएको सिरिजका चार खेलमा नेपाल चारै खेलमा पराजित भएको हो। यो समेत गरी नेपालले आफ्ना आठ सिरिजमध्ये दोस्रो सिरिजमा चारै खेलमा पराजय भोगेको हो।
युएई र अमेरिकासँगको सिरिजमा पनि नेपाल चारै खेलमा पराजित भएको थियो।
जितविहीन बनेको सिरिजको संख्या भने तीन पुगेको छ। यसअघि क्यानडामा ओमानसम्मिलित सिरिजमा नेपाल तीन खेलमा पराजित हुँदा ओमानसँगको एक खेल नजिताविहीन बनेको थियो।
नेदरल्यान्ड्समा खेलिएका चारै खेल गुमाउने क्रममा नेपालले बुधबार घरेलु टोलीसँग ५७ रनको हार ब्यहोर्यो।
नेदरल्यान्ड्सले दिएको २२६ रनको लक्ष्य पछ्याएको नेपालका लागि कुनै ब्याटरले राम्रो खेल सकेनन्। नेपाल ४८ ओभरमा १६८ रनमा अलआउट भयो।
ओपनर कुशल भुर्तेल शून्यमा आउट भएसँगै सुरु भएको नेपालको इनिङग्समा कुशलका ओपनिङ पार्टनर आसिफ शेखले ७८ बलमा ३८ रन बनाए।
रोहित पौडेलले ३८ बलमा २६ रन बनाए भने करण केसीले २३ रन बनाए। अरु ब्याटर सस्तैमा आउट भए।
बलिङमा नेदरल्यान्ड्सका केल केइनले ३ विकेट लिए।
त्यसअघि टस जितेको नेपालले फिल्डिङ रोजेपछि पहिले ब्याटिङ गरेको नेदरल्यान्ड्सले ९ विकेटको क्षतिमा २२५ रन बनायो। उसका लागि स्कट इडवार्डले ५७ रन र नोआ क्रोइसले ७० रन बनाए। दुईबीच पाँचौ विकेटका लागि भएको १२५ रनको साझेदारी महत्वपूर्ण भयो।
स्टार स्पिनर सन्दीप लामिछानेले लगातार तीन खेलमा विकेट लिन नसकेपछि उनीबिना मैदान उत्रिएको नेपालका लागि करण केसीले ४ विकेट लिए। अघिल्लो खेलमा उनले ५ विकेट लिएका थिए।
दीपेन्द्रसिंह ऐरीको नाममा २ विकेट रह्यो।
यो सिरिजमा खराब प्रदर्शनसँगै ओमानमा क्यानडा सम्मिलित सिरिज खेल्नुअघि नेपालको ३२ खेलबाट २४ अंक छ। नेपाल अंक तालिकाको छैटौं स्थानमा छ। अब बाँकी रहेका चारै खेल जितेर चौथो बन्ने सम्भावना लगभग सकिएको छ।
नेपालले बाँकी रहेका चारै खेल जित्दा आठ खेल खेल्न बाँकी रहेको ओमानले कुनै पनि खेल नजिते मात्र नेपालको सम्भावना हुनेछ। जुन समिकरण असम्भव जस्तै छ। चौथो स्थानको ओमानको ८ खेल खेल्न बाँकी रहदा ३१ अंक छ। ३८ अंक जोडेका स्कटल्यान्ड र नेदरल्यान्ड्सलाई पछि पार्ने सम्भावना त यसअघि नै सकिएको थियो।
अब नेपालले विश्वकप छनोट र एकदिवसीय मान्यता जोगाउनका लागि आठ टोलीबीचको विश्वकप छनोट प्लेअफ खेल्नु पर्नेछ। सो प्लेअफमा शीर्ष चारमा परेमा भने नेपालले एकदिवसीय मान्यता र विश्वकप छनोट खेल्न पाउनेछ।
