आइसिसी विश्वकप लिग-२ अन्तर्गतको पछिल्लो नतिजासँगै नेपालको शीर्ष चारमा परेर सिधै विश्वकप छनोट खेल्ने र एकदिवसीय मान्यता सुरक्षित गर्ने सम्भावना लगभग समाप्त भएको छ।
नेदरल्यान्ड्समा भएको त्रिकोणात्मक एकदिवसीय सिरिजमा खराब प्रदर्शन गर्दै नामिबिया र नेदरल्यान्ड्ससँगका चारै खेलमा पराजित भएपछि नेपालको यो कठिन मोडमा आइपुगेको हो।
लिग-२ मा नेपालको निराशाजनक प्रदर्शन सन् २०२४ देखि सुरु भएको यो लिग-२ मा नेपालले हालसम्म ३२ खेल खेलिसकेको छ। जसमा नेपालले मात्र ११ खेलमा जित निकाल्दा १९ खेलमा हार व्यहोरेको छ भने २ खेल नतिजाविहीन बनेका छन्। कुल २४ अंकसहित नेपाल तालिकाको छैटौँ स्थानमा छ।
अब नेपालले ओमानमा आफ्नो अन्तिम सिरिज खेल्न बाँकी छ। जहाँ नेपाल, ओमान र क्यानडाबीच प्रतिस्पर्धा हुनेछ।
तर, गणितीय हिसाबले नेपालले बाँकी सबै ४ खेल जिते पनि र चौथो स्थानमा रहेको ओमानले आफ्ना सबै आठ खेल हारे पनि नेपाल शीर्ष चारमा उक्लिने सम्भावना 'असम्भव' जस्तै देखिएको छ। किनभने ओमानको ३१ अंक छ र उसले अझै ८ खेल खेल्न बाँकी छ।
अब कसरी जोगिन्छ नेपालको एकदिवसीय मान्यता?
लिग-२ को शीर्ष चारमा पर्न नसके पनि नेपालको विश्वकप यात्रा र एकदिवसीय मान्यता जोगाउने एउटा अन्तिम ढोका अझै खुला छ। त्यो हो— विश्वकप छनोट प्लेअफ।
आइसिसीको नियम अनुसार लिग-२ को अन्त्यमा पुछारमा रहने चार टोली (जसमा नेपाल पर्ने निश्चित प्रायः छ) र च्यालेन्ज लिगबाट आउने उत्कृष्ट चार टोली गरी कुल ८ टोलीबीच प्लेअफ हुनेछ।
यो प्लेअफ प्रतियोगितामा शीर्ष चारभित्र पर्न सकेमा मात्र नेपालको एकदिवसीय मान्यता अर्को चक्रका लागि कायम रहनेछ र नेपालले जिम्बावे वा अन्य देशमा हुने मुख्य विश्वकप छनोट खेल्न पाउनेछ।
प्लेअफमा कस्ता टोली हुनेछन्?
विश्वकप छनोट प्लेअफमा कुल ८ टोलीले प्रतिस्पर्धा गर्नेछन्। ती टोलीहरु यस प्रकार हुनेछन्।
१. लिग-२ का पुछारका चार टोली: वर्तमान तालिका अनुसार यसमा नेपाल, नामिबिया, क्यानडा र युएई पर्ने सम्भावना बढी छ।
२. च्यालेन्ज लिगका शीर्ष चार टोली: च्यालेन्ज लिगबाट जर्सी, कुवेत, युगान्डा र इटालीले प्लेअफमा आफ्नो स्थान पक्का गरिसकेका छन्।
विश्वकप पुग्ने अन्तिम लक्ष्य यदि नेपालले यो ८ टोली सम्मिलित प्लेअफमा उत्कृष्ट प्रदर्शन गर्दै शीर्ष ४ मा स्थान बनाउन सफल भयो भने, नेपाल १० टोली सहभागी हुने 'विश्वकप छनोट' मा पुग्नेछ।
सो मुख्य छनोट प्रतियोगितामा:
• लिग-२ का शीर्ष ४ टोली
• प्लेअफका शीर्ष ४ टोली
• र आइसिसी ओडिआई वरियताका ११औँ र १२औँ स्थानका टोलीहरु रहनेछन्।
यो मुख्य छनोट प्रतियोगिताको शीर्ष चारमा पर्न सफल भएमा मात्र नेपालले २०२७ मा दक्षिण अफ्रिका, जिम्बावे र नामिबियामा आयोजना हुने विश्वकप खेल्न पाउनेछ। लिग-२ मै संघर्ष गरेको नेपालले विश्वकप छनोटमा शीर्ष चारमा परेर विश्वकप खेल्ने कुरा असम्भव जस्तै छ।
लिग-२ मा सोचेजस्तो प्रदर्शन हुन नसके पनि नेपालका लागि प्लेअफ एउटा यस्तो अवसर हो जहाँ गल्ती सच्याउँदै आफ्नो एकदिवसीय मान्यता जोगाउने लक्ष्यलाई जीवित राख्न सकिन्छ। यसका लागि नेपालले अब ओमान र क्यानडा विरुद्धका बाँकी खेललाई प्लेअफको तयारीको रूपमा लिनु आवश्यक देखिन्छ।
