क्वालालम्पुरमा भएको 'आईसीसी यू–१९ महिला टी–२० विश्वकप एसिया छनोट' को फाइनलमा मलेसियालाई मात्र १ रनले पराजित गर्दै युएई सन् २०२७ को विश्वकपका लागि छनोट भएको छ।
आठ टोली सहभागी यस छनोट प्रतियोगिताबाट युएई अर्को वर्ष नेपाल र बंगलादेशमा हुने यू-१९ महिला विश्वकपमा पुग्न सफल भएको हो।
फाइनल खेलमा युएई ९५ रनमै समेटिएको भए पनि उसले आफ्नो कसिलो बलिङका कारण उक्त स्कोरलाई सफलतापूर्वक रक्षा गर्यो। खेलमा ३१ रन बनाउनुका साथै १२ रन दिएर २ विकेट लिएकी अल मसिरा जहांगीर 'प्लेयर अफ द म्याच' घोषित भइन्।
प्रतियोगिताभरि युएई अपराजित रह्यो। उसले समूह चरणमा हङकङ, मलेसिया र कतारलाई हराएको थियो भने सेमिफाइनलमा भुटानलाई पाखा लगाएको थियो।
सन् २०२७ को विश्वकप यस उमेर समूहको तेस्रो संस्करण हो। युएई सन् २०२३ को पहिलो विश्वकपमा सहभागी भए पनि सन् २०२५ मा भने छनोट हुन सकेको थिएन।
यसैबीच, सामोआले पनि पूर्वी एसिया–प्रशान्त क्षेत्रको छनोट जितेर सन् २०२७ को विश्वकपमा आफ्नो स्थान सुरक्षित गरेको छ।
पपुवा न्युगिनीमा भएको खेलहरूमा फिजी, इन्डोनेसिया, भानुआटु र आयोजक पपुवा न्युगिनीलाई हराउँदै सामोआ पनि अपराजित रह्यो। सामोआ लगातार दोस्रो पटक विश्वकपमा छनोट भएको हो। यसअघि उसले सन् २०२५ को विश्वकपका लागि पनि स्थान पक्का गरेको थियो।
