फिफा विश्वकप २०२२ अन्तर्गत दक्षिण अमेरिकी छनोटमा ब्राजिलले पेरुमाथि बुधबार ४-२ गोलको जित निकाल्दा नेइमारले ह्याट्रिक गरे।
नेइमारले सुरावती दुई गोल पेनाल्टीमार्फत गरेका थिए। दोस्रो हाफको इन्जुरी टाइममा उनले गोल गर्दै ह्याट्रिक पूरा गरेका थिए।
ह्याट्रिक गरेसँगै नेइमार ब्राजिलका लागि सर्वाधिक अन्तर्राष्ट्रिय गोल गर्ने खेलाडीको सूचीमा दोस्रो स्थानमा उक्लिएका छन्।
२८ वर्षीय नेइमारले अहिलेसम्म १०३ खेलमा ६४ गोल गरिसकेका छन्। बुधबार ह्याट्रिक गरेसँगै उनले ब्राजिलका लागि सर्वाधिक गोल गर्ने सूचीमा रोनाल्डोलाई पछि परे।
तेस्रो स्थानमा धकेलिएका रोनाल्डोले ब्राजिलका लागि ९८ खेलमा ६२ गोल गरेका थिए। १७ वर्षको अन्तर्राष्ट्रिय करिअरमा रोनाल्डोले दुई विश्वकप, दुई कोपा अमेरिका र एक कन्फेडेरेनस कपको उपाधि उचाले।
ब्राजिलका लागि सर्वाधिक गोलको कीर्तिमान भने पेलेको नाममा छ। पेलेले ब्राजिलका लागि ७७ अन्तर्राष्ट्रिय गोल गरेका थिए। नेइमार पेलेलाई पछि पार्न १४ गोलले टाढा छन्।
नेइमारले पेलेको कीर्तिमान भंग गर्ने ब्राजिलका पूर्व गोलकिपर ताफारेलले विश्वास गरेका छन्।
फ्रेञ्च क्लब पिएसजीका फरवार्ड नेइमारको सिजनको सुरुवात भने सोचे जस्तो हुन सकेन।
सिजनको सुरुमा उनलाई कोरोना भाइरसको संक्रमण भएको थियो। जसका कारण उनले फ्रेञ्च लिग वानका सुरुवाती खेल गुमाए।
यस्तै मार्सेलीविरुद्धको खेलमा झगडा गरेका कारण उनले रातो कार्ड पाउनुका साथै थप दुई खेलको प्रतिबन्ध झेले।त्यसपछिका दुई खेलमा भने उनले तीन गोल गरे।
उनले ब्राजिलका लागि झन्डै ११ महिनापछि खेले। विश्वकप छनोटको पहिलो खेलमा बोलिभियालाई ब्राजिलले ५-० ले हराउँदा नेइमारले गोलका लागि दुई पास उपलब्ध गराएका थिए।
