नेपालको घरेलु फुटबलको शीर्ष लिग आयोजना गर्ने विषयमा युवा तथा खेलकुद मन्त्रालयले सरोकारवालासँग छलफल गरेको छ।
नेपाली घरेलु फुटबलको सहिद स्मारक ‘ए’ डिभिजन लिग तीन वर्षदेखि रोकिएको छ।
अखिल नेपाल फुटबल संघ (एन्फा) ले होम एन्ड अवे फर्म्याटमा आगामी पुस ९ गतेदेखि शीर्ष डिभिजन लिग गर्ने प्रस्ताव गरेको थियो।
तर १४ वटा क्लबहरूमध्ये धेरैले समय अभाव हुने र आवश्यक प्रायोजक पनि नपाएकाले तत्काल लिग खेल्न नसकिने बताएपछि एन्फाले होम एन्ड अवे लिग अर्को वर्ष गर्ने घोषणा गरेको थियो।
बिहीबार खेलकुद मन्त्रालयले एन्फा र क्लबहरूसँग लिग आयोजना गर्ने विषयमा छलफल गरेको हो।
युवा तथा खेलकुदमन्त्री बब्लु गुप्ता, राष्ट्रिय खेलकुद परिषद् (राखेप) का सदस्यसचिव टंकलाल घिसिङ, एन्फाका महासचिव किरण राई र विभिन्न क्लबका प्रतिनिधिबीच छलफल भएको छ।
एन्फाका महासचिव राईले छलफलमा तत्कालीन र दीर्घकालसम्म नेपाली फुटबल अगाडि बढाउने राज्यले गर्नुपर्ने सहयोग र सहजीकरणका लागि मन्त्रालयको भूमिकाबारे छलफल भएको उल्लेख गरे।
नेपाली फुटबल विकासका लागि राज्य हरेक किसिमको सहयोग र समन्वयकारी भूमिका खेल्न तयार रहेको मन्त्री गुप्ताको धारणा आएको एन्फाका महासचिव राईको भनाइ छ।
दीर्घकालीन रूपमा नेपाली फुटबल विकासका लागि कार्यदल निर्माण गरिएको राईले जानकारी दिए। एन्फाका कार्यकारी अधिकृत इन्द्रमान तुलाधार, मन्त्रालय र राखेपको पनि उक्त कार्यदलमा प्रतिनिधि रहेको एन्फाका महासचिव राईले उल्लेख गरेका छन्।
उक्त समितिलाई पाँच दिनभित्र एउटा खाकासहित प्रतिवेदन मन्त्रालयमा पेश गर्ने जिम्मेवारी दिइएको छ।
लिग आयोजना गर्न राज्यले एन्फा र क्लबहरूलाई आर्थिक सहयोग उपलब्ध गराउने विषयमा पनि छलफल भएको उनले उल्लेख गरेका छन्।
साथै, होम एन्ड अवे अवधारणामा आयोजना गर्न लागिएको लिगका लागि क्लबहरूलाई राज्य मातहतका पूर्वाधार उपयोग गर्ने विषयमा पनि छलफल भएको एन्फाका महासचिव राईले बताए।
विदेशी खेलाडी भित्र्याउँदा उनीहरूको श्रम स्वीकृतिलगायतमा मन्त्रालयले सहजीकरण गर्ने प्रतिबद्धता प्राप्त भएको छ।
मन्त्रालयले एन्फाको काममा हस्तक्षेप गरेको भन्ने आरोपमा भने महासचिव राईले निराधार रहेको धारणा राखे। मन्त्री गुप्ताले आफू हस्तक्षेपभन्दा पनि प्रतियोगिता होस् भन्ने चाहनाअनुरूप छलफल अगाडि बढाएको धारणा राख्नुभएको एन्फाका महासचिव राईले उल्लेख गरेका छन्।
क्लब र एन्फालाई परेको समस्यामा सहयोग गर्ने उद्देश्यले मन्त्रालयले यो छलफल अगाडि बढाएको उनको धारणा छ।
कम्तीमा ५० दिनभित्र लिग सञ्चालन गर्नेगरी छलफल भएको र त्यसमा क्लबहरू पनि तयार रहेको छलफलमा कुरा आएको उनको भनाइ छ।
आफूहरू लिग गर्न तयारी नै रहेको र तर सँगै क्लबलाई पनि अगाडि लिएर लिग गर्न एन्फाको चाहना रहेको महासचिव राईले बताएका छन्।
उनले एन्फालाई मन्त्रालय र राखेपको सहयोग आवश्यक रहेको अवस्थामा अभिभावकीय संस्थाले चासो दिनु सुखद पक्ष रहेको धारणा राखेका छन्।
एन्फाको असक्षमताभन्दा पनि मन्त्रालयले सहयोग गर्न खोजेको र आफूहरूले सहयोग लिन चाहेकाले यो छलफल भएको महासचिव राईको भनाइ छ।
एन्फाका पूर्वअध्यक्ष कर्माछिरिङ शेर्पाले एन्फाको क्षेत्राधिकारमा मन्त्रालयले हस्तक्षेप गरेको भन्दै विरोध जनाएका छन्। ‘ए’ डिभिजन क्लब हिमालयन शेर्पाका अध्यक्षसमेत रहेका शेर्पा उक्त छलफलमा सहभागी भएनन्।
मछिन्द्र क्लबका अध्यक्ष अनिल श्रेष्ठले भने सबै क्लबहरू लिग खेल्न तयार रहेको र तर तयारी गर्न समय कम भएको मात्र आफूहरूले उल्लेख गरेको बताएका छन्। उनले रेलिगेसन बचाउनका लागि नै दुई करोड खर्च हुने भएकाले कम्तीमा आफूहरूलाई ८–९ महिना समय आवश्यक पर्ने बताएका छन्।
फुटबल खेलेरै क्लबहरूले आम्दानी गरिरहेको उल्लेख गर्दै उनले आफूहरू जुनसुकै अवस्थामा लिग खेल्न तयार रहेको मछिन्द्रका अध्यक्ष श्रेष्ठ बताउँछन्।
क्लब होम एन्ड अवे आधारमा खेल्न तयार रहेको तर त्यसका लागि दीर्घकालीन योजना र समय आवश्यक रहेको उनले बताएका छन्।
गत वर्ष मात्र ‘बी’ डिभिजन लिगको साइकल पूरा भएको थियो। यहाँबाट श्री भगवती तथा प्लानिङ ब्वाइज क्लब शीर्ष डिभिजनमा बढुवा भए। एन्फाले अन्तिमपटक २०७९ मा ‘ए’ डिभिजन लिग गरेको थियो। त्यसमा नवप्रवेशी चर्च ब्वाइज युनाइटेड लिग च्याम्पियन बनेको थियो।
तर, त्यसपछि एन्फाको आन्तरिक राजनीतिमा लिग आयोजना पर्दा लिग सञ्चालन हुन सकेको छैन। —न्युज एजेन्सी नेपाल
-1746009348.jpg)
