राष्ट्रिय फुटबल टोलीका मुख्य प्रशिक्षक हरि खड्काले मलेसिया र बंगलादेशविरूद्धको खेलका लागि प्रारम्भिक टोलीमा ३५ खेलाडी बोलाएका छन्।
खड्काले बंगलदेशविरूद्धको मैत्रीपूर्ण खेल र एएएफसी एसियन कप छनोटको खेलका लागि प्रारम्भिक टोली घोषणा गरेका हुन्।
यसअघि मुख्य प्रशिक्षक म्याट रसले पदबाट राजीनामा दिएका थिए। एसियन कप छनोटमा नेपालले लगातार चार हारसँगै बाहिएसँगै उनले पद त्यागेका थिए।
राष्ट्रिय टोलीका पूर्वकप्तान तथा फरवार्ड खड्काले आगामी कात्तिक २७ गते बिहीबार नेपाल र बंगलादेशबीच फिफा विन्डोमा अन्तर्राष्ट्रिय खेलबाट नेपाली टोली सम्हाल्दैछन्।
बंगलादेशमा हुने उक्त खेल साँझ पौने आठ वजे सुरू हुनेछ। यसअघि अफगानिस्तानसँग बंगलादेशले खेल्ने तय भएको थियो। तर अफगानिस्तानसँगको खेल रद्द भएसँगै बंगलादेशले नेपाललाई बोलाएको हो।
नेपालले बंगलादेशसँग खेलेको एक सातापछि मलेसियासँग अर्को खेल खेल्नेछ। नेपालले एएफसी एसियन कप छनोटअन्तर्गत मलेसियासँग मंसिर २ मा आफ्नो पाँचौ खेल खेल्नेछ।
मलेसियाविरूद्धको उक्त खेल घरेलु मैदानमा खेल्नु पर्ने भए पनि दशरथ रंगशालाले अन्तर्राष्ट्रिय मान्यता नपाउँदा उक्त खेल मलेसियमै खेल्नु पर्ने बाध्यता छ।
एसियन कप छनोटका यसअघिका चार खेलमा नेपालले रसको प्रशिक्षणमा खेल्दा चार खेल्दा सबै खेलमा पराजय भोगेको थियो।
मलेसिया र लाओससँग एक एक खेल भियतनामसँग दुवै खेलमा पराजित भएसँगै नेपाल छनोटबाट बाहिरिसकेको छ।
प्रारम्भिक टोली : किरण कुमार लिम्बु (गोलकिपर), दीप कार्की (गोलकिपर), बिशाल सुनार (गोलकिपर), टिकेन्द्र थापा (गोलकिपर), अनन्त तामाङ, रोहित चन्द, सुमन श्रेष्ठ, सनिश श्रेष्ठ, बिमल पाण्डे, अभिषेक लिम्बु, योगेश गुरुङ, सुमित श्रेष्ठ, दिवाकर चौधरी, सृजन राज गौतम, सन्जिव लामा, शंकर थारु, दिपेश धिमाल, एरिक विष्ट, मणि कुमार लामा, कृतिश रत्न छुन्जु, लाकेन लिम्बु, मनिष डाँगी,रोहन कार्की, सन्तोष खत्री, दिपेश गुरुङ, कुशल देउवा, जिलेस्पी जङ्ग कार्की, अन्जन विष्ट, आयुष घलान,दिनेश हेञ्जन सुवास बम,समिर तामाङ, आदित्य शाक्य, जर्जप्रिन्स कार्की, नवयुग श्रेष्ठ।
-1746009348.jpg)
