रियल म्याड्रिडका मुख्य प्रशिक्षक जोसे माउरिन्होले म्याड्रिड डर्बीमा २-१ को हारपछि रेफ्रीको निर्णयप्रति तीव्र असन्तुष्टि जनाउँदै पत्रकार सम्मेलनमा प्रिन्ट गरिएका तस्बिरहरू प्रदर्शन गरेपछि एट्लेटिको म्याड्रिडले सामाजिक सञ्जालमार्फत कडा जवाफ गरेको छ।
माउरिन्होले पहिलो हाफमै एट्लेटिकोका दुई खेलाडीलाई रातो कार्ड दिनुपर्ने दाबी गरेपछि एट्लेटिकोले रेफ्रीमाथिको उत्पीडन रोक्न माग गर्दै व्यंग्यात्मक भिडियो र पोस्ट सार्वजनिक गरेको हो।
आइतबारको डर्बी खेलमा एट्लेटिको म्याड्रिडसँग २-१ ले पराजित भएपछि आयोजित पत्रकार सम्मेलनमा माउरिन्हो एफोर आकारको कागजमा दुईवटा घटनाको स्क्रिनसट प्रिन्ट गरेर पुगेका थिए। उनले ‘हामीले पत्रकार सम्मेलन रद्द गरे पनि हुन्छ, किनभने खेलको मुख्य कथा यहीँ छ’ भन्दै ती तस्बिरहरू मिडियासामु देखाएका थिए।
माउरिन्होका अनुसार पहिलो हाफमै एट्लेटिकोका दुई खेलाडीलाई स्पष्ट रातो कार्ड दिइनुपर्थ्यो। दोस्रो हाफमा १० खेलाडीमा सीमित भएर खेल्नुपरेको अवस्थालाई संकेत गर्दै उनले ‘हामी १० विरुद्ध ११ खेल्दा त गाह्रो भयो भने, ५० मिनेटसम्म ९ खेलाडीविरुद्ध ११ जना खेलेको भए के हुन्थ्यो कल्पना मात्र गर्न सकिन्छ’ भनेका थिए।
खेल ०-० को बराबरीको अवस्थामा रहँदा दोस्रो हाफको सुरुवातमै रियल म्याड्रिडका डिफेन्डर डिन हुइसेनले एट्लेटिकोका जुलियानो सिमेओनीलाई पेनाल्टी क्षेत्रभित्र लडाएपछि रातो कार्ड पाएका थिए।
रियल म्याड्रिडको आधिकारिक वेबसाइटमा प्रकाशित म्याच रिपोर्टमा रेफ्री ओर्टिज एरियासको ‘भयानक रेफ्रीइङ’ का कारण डर्बी खेलको नतिजा प्रभावित भएको दाबी गरिएको छ। सेप्टेम्बरको सुरुमा रियल बेटिससँग १-० ले पराजित भएको रियल म्याड्रिडको यो यस सिजनको दोस्रो हार हो।
माउरिन्होको यस कदमपछि डिएगो सिमेओनीको प्रशिक्षणमा रहेको एट्लेटिको म्याड्रिडले आफ्नो आधिकारिक एक्स खातामा दुईवटा पोस्ट गर्दै व्यंग्यात्मक जवाफ फर्काएको छ।
पहिलो पोस्टमा एउटा भिडियो शेयर गरिएको छ जसमा प्रिन्टरबाट एउटा कागज निस्किएको देखिन्छ। सो कागजमा #StopAcosoArbitralYA अर्थात् ‘रेफ्रीमाथि हुने उत्पीडन तुरुन्त रोक’ भन्ने सन्देश लेखिएको छ। दोस्रो पोस्टमा माउरिन्होले पत्रकार सम्मेलनमा कागज समातेको तस्बिरसहित सोही सन्देश पोस्ट गरिएको थियो।
यो प्रतिक्रिया पोस्ट भएको दुई घण्टाभित्रै एक्समा २० लाख भन्दा बढी पटक हेरिएको थियो। एट्लेटिको म्याड्रिडले आफ्ना प्रतिस्पर्धीहरूलाई व्यंग्य गर्न प्रायः सामाजिक सञ्जालको प्रयोग गर्ने गर्दछ। यसअघि पनि उसले जुलियन अल्भारेजलाई अनुबन्ध गर्ने प्रयासलाई लिएर बार्सिलोनाको खिल्ली उढाएको थियो।
-1746009348.jpg)
