म्यानचेस्टर सिटीलाई प्रिमियर लिगका वित्तीय नियम उल्लंघनसम्बन्धी अधिकांश आरोपमा दोषी ठहर गरिएपछि अब अर्को ठूलो प्रश्न उठेको छ—सिटीले जितेका पुराना उपाधि पनि खोसिन्छन् त?
सिटीमाथि सन् २००९ देखि २०१८ सम्म वित्तीय नियम उल्लंघन गरेको आरोप लागेको थियो। यही अवधिमा क्लबले तीनपटक प्रिमियर लिगसहित आठ ठूला उपाधि जितेको थियो।
तर अहिलेको अवस्थामा उपाधि खोसिने सम्भावना निश्चित भने छैन। बिबिसीका अनुसार प्रिमियर लिग संस्था र क्लबहरूबीच विगतका उपाधि नै खोस्ने विषयमा खासै उत्साह देखिएको छैन। अन्तिम निर्णय भने स्वतन्त्र अनुशासनात्मक प्यानलको ‘स्यान्क्सन हियरिङ’ पछि हुनेछ।
सम्भावित कारबाहीमा ठूलो जरिवाना, अंक कटौतीदेखि प्रिमियर लिगबाट निष्कासनसम्मका विकल्प चर्चा भइरहेका छन्। उपाधि खोस्ने वा पुनः बाँड्ने विकल्प पनि नियमले पूर्ण रूपमा असम्भव बनाएको छैन।
यदि उपाधि नै खोसियो भने त्यसले इंग्लिस फुटबलको इतिहास नै फेरबदल गर्न सक्छ।
सिटीका ती आठ उपाधिका तत्कालीन उपविजेताहरूमा म्यानचेस्टर युनाइटेड, लिभरपुल, स्टोक सिटी, सन्डरल्यान्ड, आर्सनल र चेल्सी पर्छन्। तर उपाधि खोसिँदैमा ती क्लबलाई स्वतः उपाधि दिइने हो कि रेकर्ड खाली राखिने हो भन्ने पनि स्पष्ट छैन।
यस विषयले अर्को जटिल प्रश्न पनि जन्माएको छ। यदि सिटीको पुरानो उपाधि खोसियो भने, विगतमा वित्तीय वा अन्य नियम उल्लंघनमा परेका अन्य क्लबका उपलब्धिमाथि पनि त्यस्तै मापदण्ड लागू गर्ने कि नगर्ने?
बिबिसीले यसलाई फुटबल इतिहासमै ठूलो विवाद बन्न सक्ने विषयका रूपमा प्रस्तुत गरेको छ। विगतमा इटालीको युभेन्टसबाट सिरि एका उपाधि खोसिएको उदाहरण छ। तर प्रिमियर लिगमा भने यस्तो कारबाहीको प्रत्यक्ष उदाहरण छैन।
अर्कोतर्फ, सिटीका पूर्वमिडफिल्डर रोड्रीले भने क्लबका खेलाडीहरूले मैदानमा गरेको मेहनत र जितको उपलब्धि कसैले खोस्न नसक्ने बताएका छन्।
तर यदि सिटीमाथि उपाधि खोस्नेभन्दा आर्थिक क्षतिपूर्तिको बाटो रोजियो भने पनि विवाद त्यत्तिकै ठूलो हुन सक्छ। सिटीका कारण आफूहरूले आर्थिक क्षति बेहोरेको दाबी गर्दै केही क्लबले क्षतिपूर्तिको कानुनी बाटो खोज्न सक्ने चर्चा छ।
त्यसको दायरा अझै ठूलो हुन सक्छ—उपाधि नजितेका क्लब, युरोपेली प्रतियोगितामा छनोट हुन नसकेका टोली, रेलिगेसनमा परेका क्लबदेखि खेलाडी, प्रशिक्षक, कर्मचारी र एजेन्टसम्मले आफ्नो सम्भावित क्षतिको दाबी गर्न सक्ने प्रश्न उठ्न सक्छ।
त्यसैले अहिलेको सबैभन्दा ठूलो प्रश्न केवल ‘सिटीको उपाधि खोसिन्छ कि खोसिँदैन?’ भन्ने मात्र होइन।
यदि खोसियो भने त्यसपछि प्रिमियर लिगको विगतका नतिजा, उपाधि र आर्थिक क्षतिपूर्तिको हिसाब कहाँसम्म पुग्छ?
सिटीको दोषी ठहरपछि अब त्यसको उत्तरका लागि सबैको नजर स्वतन्त्र प्यानलको आगामी निर्णयमा छ।
-1788334994.jpg)
.JPG)
-1746513231.jpg)
