नेपाल प्रिमियर लिग (एनपिएल) अन्तर्गत विराटनगर किंग्स र सुदूरपश्चिम रोयल्सबीच अन्ततः खेल हुने भएको छ। वर्षाका कारण शनिबार त्रिवि क्रिकेट मैदानको आउटफिल्ड खराब भएपछि अन्योलमा परेको खेल लामो रस्साकस्सीपछि ५–५ ओभरमा खेलाउने सहमति भएको हो।
यसअघि साँझ ७:४० बजे ५ ओभरको खे खेल सुरु गर्ने सहमति भए पनि आउटफिल्डको अवस्थालाई लिएर सुदूरपश्चिमले खेल्न मानेको थिएन। मैदानको अवस्था खेलका लागि सुरक्षित नभएको भन्दै सुदूरपश्चिमले टसमा समेत सहभागिता जनाएको थिएन।
शनिबार दिनभरको वर्षाका कारण त्रिवि मैदानको आउटफिल्डमा पानी जम्मा भएको थियो। यसअघि लुम्बिनी लायन्स र चितवन राइनोजबीचको पहिलो खेल पनि वर्षाकै कारण रद्द भएको थियो।
त्यसपछि ग्राउन्ड स्टाफले लगातार मिहिनेत गरेर मैदान खेल्नयोग्य बनाएपछि ५ ओभरको खेल गराउने सहमति जुटेको हो। यसक्रममा नेपाल क्रिकेट संघ (क्यान) का सचिव पारस खड्कालगायतले सुदूरपश्चिमका अफिसियलसँग छलफल गरेका थिए। लामो छलफलपछि सुदूरपश्चिम खेल्न तयार भएको हो।
खेलका लागि त्रिवि मैदानमा हजारौँ दर्शक उपस्थित छन्। निर्धारित समयभन्दा ढिला सुरु हुन लागेको खेल अब राति ९ बजेर २० मिनेटमा सुरु हुनेछ।
खेलमा सुदूरपश्चिमले टस जितेर पहिले बलिङ गर्ने निर्णय गरेको छ।
