नेपाल प्रिमियर लिग (एनपीएल) को तेस्रो संस्करणअन्तर्गत मंगलबार दुई खेल हुँदैछन्। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा विराटनगर किंग्स र जनकपुर बोल्ट्स भिड्दा दोस्रो खेलमा लुम्बिनी लायन्स र पोखरा एभेन्जर्स आमनेसामने हुनेछन्।
प्रतियोगिताअन्तर्गत पहिलो खेल दिउँसो १२:३० बजे सुरु हुनेछ। दोस्रो खेल साँझ ५ बजे खेलाइने तालिका छ।
पहिलो खेलमा विराटनगरले अहिलेसम्म खेलेका तीनमध्ये एक खेल जितेको छ भने दुई खेलमा पराजित भएको छ। चौथो खेल खेल्न लागेको विराटनगर दोस्रो जित निकाल्ने लक्ष्यमा हुनेछ।
अर्कोतर्फ, जनकपुरले तीनमध्ये दुई खेल जितेको छ। पहिलो खेलमा कर्णाली याक्ससँग पराजित भए पनि त्यसपछि काठमाडौं गोर्खाज र पोखरा एभेन्जर्सलाई हराउँदै जनकपुरले लय समातेको छ। आजको खेल जिते जनकपुर लगातार तेस्रो जित निकाल्न सफल हुनेछ।
दोस्रो खेलमा लुम्बिनी लायन्स अपराजित यात्रा कायम राख्ने लक्ष्यसहित मैदान उत्रनेछ। लुम्बिनीले खेलेका दुई खेलमध्ये एकमा जित निकालेको छ भने वर्षाका कारण एक खेल रद्द हुँदा अंक बाँडेको थियो।
पोखरा एभेन्जर्स भने प्रतियोगितामा पहिलो जितको खोजीमा छ। पोखराले यसअघि खेलेका दुवै खेल गुमाएको छ। जनकपुरसँगको पछिल्लो खेलमा ९ रनले पराजित भएको पोखराका लागि आजको खेल जित्नैपर्ने दबाब हुनेछ।
