नेपाल प्रिमियर लिग (एनपीएल) को तेस्रो संस्करणअन्तर्गत चितवन राइनोजले पोखरा एभेन्जर्सलाई १५२ रनको लक्ष्य दिएको छ। कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको चितवनले निर्धारित २० ओभरमा ६ विकेट गुमाएर १५१ रन बनाएको हो।
चितवनका कप्तान सिकन्दर रजाले आक्रामक ब्याटिङ गर्दै सर्वाधिक ३७ रन बनाए। उनले १६ बलमा २ चौका र ४ छक्का प्रहार गरे। रवि बोपाराले २८ बलमा ३ चौका र १ छक्कासहित ३५ रन जोडे।
त्यस्तै, अर्जुन साउदले २७ बलमा ३१ र डेविड मलानले २८ बलमा २८ रन बनाए। कुशल मल्लले १३ बलमा ११ रनको योगदान दिए। कमलसिंह ऐरी ४ रनमा अविजित रहे।
सुरुवात राम्रो, मध्यक्रममा दबाब
चितवनले पहिलो विकेटका लागि अर्जुन साउद र डेविड मलानबीच ६० रनको साझेदारी गरेको थियो। आठौं ओभरको अन्तिम बलमा अर्जुन साउदलाई विपिन खत्रीले आउट गरेपछि चितवनले लगातार विकेट गुमायो।
त्यसको अर्को बलमै मलान कुशल भुर्तेलको बलमा बोल्ड भए। त्यसपछि डान मौस्ली २ रनमा आउट हुँदा चितवन १०.१ ओभरमा ६३/३ को अवस्थामा पुगेको थियो।
कुशल मल्ल र रवि बोपाराले चौथो विकेटका लागि २३ रन थपे। ११ रन बनाएका मल्ल १४.४ ओभरमा आउट भए।
पाँचौं विकेटका लागि बोपारा र सिकन्दर रजाले ६० रनको महत्वपूर्ण साझेदारी गरे। अन्तिम ओभरतिर आक्रामक बनेका रजाले १६ बलमै ३७ रन बनाए। बोपारा ३५ रनमा आउट भएपछि रजा पनि त्यसको दुई बलपछि पभेलियन फर्किए।
अन्तिम ५ ओभरमा ६० रन
चितवनले अन्तिम पाँच ओभरमा आक्रामक ब्याटिङ गर्दै ६० रन जोड्यो। सुरुवाती १५ ओभरमा ९१ रन बनाएको चितवनले अन्तिम पाँच ओभरमा तीव्र गतिमा रन बटुल्दै स्कोर १५१ पुर्याएको हो।
पोखराका लागि विपिन खत्री, कुशल भुर्तेल र चमिका करुणारत्नेले समान २ विकेट लिए। खत्रीले ४ ओभरमा २२ रन खर्चिए। भुर्तेलले २६ र करुणारत्नेले ३४ रन दिए। मेहदी हसनले ४ ओभरमा ३२ रन खर्चिए पनि विकेट लिन सकेनन्।
चितवनले अब पोखरासामु जितका लागि १५२ रनको लक्ष्य प्रस्तुत गरेको छ। लगातार तीन खेलमा पराजित पोखरालाई प्रतियोगितामा पहिलो जित निकाल्न यो लक्ष्य पूरा गर्नुपर्नेछ।
