प्रिमियर लिग (एनपिएल) को तेस्रो संस्करणअन्तर्गत शुक्रबार जारी खेलमा सुदूरपश्चिम रोयल्सले कर्णाली याक्सलाई १७७ रनको लक्ष्य दिएको छ।
कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १७६ रन बनायो।
सुदूरपश्चिमका लागि साइफ जैबले सर्वाधिक ३५ रन बनाए। उनले २४ बलमा ४ चौका र १ छक्का प्रहार गरे। विनोद भण्डारीले २२ बलमा २ चौका र २ छक्कासहित २७ रन बनाए।
तेस्रो विकेटका रूपमा क्रिजमा आएका ब्रान्डन म्याकमुलेनले १६ बलमा २ चौका र १ छक्काको मद्दतमा २४ रन जोडे। उनले जैबसँग मिलेर तेस्रो विकेटका लागि २१ रनको साझेदारी गरे।
त्यसपछि इशान पाण्डेले आक्रामक ब्याटिङ गरे। उनले १३ बलमा ३ छक्कासहित २३ रन बनाए। इशानले छैटौं विकेटका लागि आरिफ शेखसँग ३२ रनको साझेदारी गरे। आरिफले १४ बलमा ११ रन बनाए।
अन्तिम ओभरहरूमा थारिन्दु रत्नायके र स्कट कुगेलेइनले सुदूरपश्चिमको स्कोरलाई मजबुत बनाए। रत्नायकेले १२ बलमा ३ चौका र १ छक्कासहित अविजित २२ रन बनाए। कुगेलेइनले ६ बलमा २ चौका प्रहार गर्दै अविजित १३ रन जोडे। उनीहरूले सातौं विकेटका लागि १५ रनको अविजित साझेदारी गरे।
पावरप्लेमा टोलीले बिना विकेट ६३ रन बनाएको थियो। तर, त्यसपछि लगातार विकेट गुमाउँदा ठूलो स्कोर बनाउने अवसर खेर गयो।
कर्णालीका मार्क वाटले उत्कृष्ट बलिङ गर्दै ४ ओभरमा २७ रन खर्चेर २ विकेट लिए। हुसैन तलतले ३ ओभरमा १३ रन दिएर १ विकेट लिए। नन्दन यादवले ४ ओभरमा ३३ रन खर्चेर १ विकेट लिए भने सूर्य तामाङले ४ ओभरमा ३२ रन दिँदै १ विकेट हात पारे।
सुदूरपश्चिमले १० ओभरमा ८८ रन बनाउँदा २ विकेट गुमाएको थियो। त्यसपछि १३.२ ओभरमा म्याकमुलेन आउट भएपछि टोली दबाबमा परेको थियो। १६.२ ओभरमा इशानको विकेट गुम्दा सुदूरपश्चिम १३६ रनमा पुगेको थियो। तर अन्तिम चार ओभरमा ४० रन जोड्दै टोलीले प्रतिस्पर्धात्मक योगफल तयार पार्यो।
