फिल्म 'बाटोः रोड टु डेथ' यही जेठ ३२ गतेदेखि प्रदर्शनमा आउँदैछ। यो फिल्मलाई मदन थापाले लेखन एवं निर्देशन गरेका हुन्।
फिल्मको प्रदर्शन मिति नजिकिँदै गर्दा यसको ट्रेलर सार्वजनिक गरिएको छ।
२ मिनेट ३४ सेकेण्डको ट्रेलरले फिल्मको कथावस्तुबारे संकेत गर्छ। थ्रिलर शैलीको ट्रेलरमा जंगलमा रहेको बाटोमा गाडीमा यात्रा गरिरहेका फरक–फरक पृष्ठभूमिका पात्रहरूले व्यहोरेको समस्यालाई देखाइएको छ।
एम्बुलेन्समा सवार भइरहेकी नर्सले अस्पतालको सामग्री हातमा बोकेर सहयोगको याचना गरिरहेको दृश्य देखाइएको छ। यसबाहेक जंगलमा बसेर हिंस्रक गतिविधि गर्ने एक समूहले मानिसलाई दिएको त्रास र दुःखलाई ट्रेलरमा समेटिएको छ। फिल्मको ट्रेलरलाई लिएर धेरैले प्रशंसा समेत गरिरहेका छन्।
यो फिल्ममा मिथिला शर्मा, आशान्त शर्मा, पशुपति राई, सुलक्षण भारती, रक्षा थापा, उत्पल झा, विजय आनन्द ताम्राकार, राजेन थापा, आभाष अधिकारी, गणेश उपाध्याय, किरण शाहीलगायतको अभिनय छ।
चन्दन झा निर्माता रहेको फिल्ममा शरण ऋषिको छायांकन, एनबी महर्जनको द्वन्द्व छ। काठमाडौं र गाईघाटमा छायांकन गरिएको फिल्मको प्राविधिक कार्य भारतको चेन्नइँमा भएको निर्माण टिमले जनाएको छ।
काठमाडौं फिल्मस्को ब्यानरमा निर्माण भएको फिल्मलाई सेन्सर बोर्डले १६ वर्ष उमेरभन्दा माथिका दर्शकले मात्र हेर्ने गरी सर्टिफिकेट दिएको छ।
भिडिओः
