बर्लिन इन्टरनेशनल फिल्म फेस्टिभल (बर्लिनाले) को यस वर्षको मुख्य अवार्ड 'यल्लो लेटर्स' (गेल्बे ब्रिफे) ले जितेको छ।
७६ औं संस्करणको फेस्टिभलमा टर्की मूलका जर्मन निर्देशक इल्केर चाटक निर्देशित फिल्मले मुख्य अवार्ड 'गोल्डेन बियर' जितेको हो।
टर्कीको परिवेशमा आधारित तर जर्मनीमा छायांकन गरिएको उक्त फिल्मले विस्तारै बढ्दै गएको अधिनायकवादबीच सृजनात्मक जीवनको संघर्षलाई चित्रण गर्छ।
त्यस्तै, सिल्भर बियर अन्तर्गत ग्राण्ड जुरी प्राइज 'कुर्टुलुस' (शल्भेशन) लाई प्रदान गरिएको छ। यसका निर्देशक एमिन अल्पर हुन्।
जुरी प्राइज भने 'क्विन एट सी' ले जितेको छ, जसको निर्देशन ल्यान्स ह्यामरले गरेका हुन्।
सिल्भर बियर अन्तर्गत उत्कृष्ट निर्देशकको अवार्ड ग्रान्ट जीलाई 'एभ्रिबडी डिग्स बिल इभान्स' का लागि प्रदान गरिएको छ। उत्कृष्ट मुख्य अभिनयतर्फको पुरस्कार सान्द्रा हुलरले 'रोज' मार्फत हात पारिन्।
उत्कृष्ट सहायक अभिनयतर्फ एना काल्डर-मार्शल र टम कोर्टनेलाई 'क्विन एट सी' का लागि सम्मान गरिएको छ। उत्कृष्ट पटकथाको अवार्ड जेनेभिएभ डुलुड-डे सेलेसलाई 'निना रोजा' का लागि प्रदान गरिएको छ।
त्यस्तै उत्कृष्ट कलात्मक योगदानतर्फ एना फिट्च र बैंकर ह्वाइटलाई 'यो लभ इज अ रेबेलियस बर्ड' का लागि सम्मानित गरिएको छ।
विश्व सिनेमा क्षेत्रमा विशेष महत्व राख्ने यो फेस्टिभलमा यस वर्ष निर्णायक मण्डलको नेतृत्व जर्मनी निर्देशक विम वेन्डर्सले गरेका थिए। नेपाली फिल्म निर्देशक मीनबहादुर भाम पनि जुरी सदस्यमा थिए।
१२ फेब्रुअरीदेखि जर्मनीको बर्लिनमा फेस्टिभल भएको थियो।
-1746009348.jpg)
