पछिल्लो दुई सातादेखि कुनै नयाँ नेपाली फिल्म रिलिज भएका छैनन्। नयाँ फिल्म नआउँदा हलहरू पुरानै फिल्मको भरमा चलिरहेका छन्। त्यसमध्ये केही फिल्मले राम्रो व्यापार गरे पनि साप्ताहिक कारोबारमा गिरावट देखिएको छ।
चलचित्र विकास बोर्डले सोमबार सार्वजनिक गरेको साप्ताहिक बक्स अफिस रिपोर्टअनुसार अघिल्लो साताको तुलनामा यो साता समग्र नेपाली फिल्महरूको व्यापारमा गिरावट आएको हो।
फिल्म 'लालीबजार' को कमाइ जेठ ३१ गतेसम्म आउँदा ९ करोड १६ लाख रूपैयाँ नाघेको छ। यसले ठूलो कमाइ गर्दै यस वर्ष अहिलेसम्मको धेरै कमाउने फिल्म बनेको छ।
यद्यपि प्रदर्शनको लामो समय हुँदा यसको साप्ताहिक व्यापारमा भने गिरावट आउँदै गएको छ। फिल्मले यसअघिको साता ८७ लाख ७४ हजार रूपैयाँ कमाएको थियो। विवरणअनुसार फिल्मले पछिल्लो साता ३७ लाख ९५ हजार रूपैयाँ मात्र थप कमाइ गर्यो।
अघिल्लो आइतबार (जेठ २४) सम्म फिल्मले ८ करोड ७८ लाख ५ हजार रूपैयाँ कमाएको थियो। त्यसअघि बक्स अफिस विवरण सार्वजनिक हुँदा कमाइ ७ करोड ९० लाख ३१ हजार रूपैयाँ थियो। विवरणअनुसार पछिल्लो साता 'लालीबजार' को व्यापारमा झन्डै ५७ प्रतिशतले गिरावट आएको देखिन्छ। यो फिल्म वैशाख २५ गते रिलिज भएको थियो।
त्यस्तै, जेठ १५ गते रिलिज फिल्म 'रोल नं. १' ले अघिल्लो आइतबार (जेठ २४) सम्म ९४ लाख ९१ हजार रूपैयाँ ग्रस कमाएको थियो। त्यसयता ४० लाख २४ हजार रूपैयाँ थप कमाइ गर्दै आफ्नो व्यापार १ करोड ३५ लाख १५ हजार रूपैयाँ पुर्याएको छ। यसले बक्स अफिसमा सुखद् व्यापार गरे पनि अघिल्लो साताको तुलनामा यससाता व्यापारमा झन्डै ५७ प्रतिशतले गिरावट आएको देखिन्छ।
जेठ १५ मा रिलिज अर्को फिल्म 'कुम्भ' भने बक्स अफिसमा निकै कमजोर देखिएको छ। यसले पछिल्लो साता बक्स अफिसमा ५८ हजार रूपैयाँ मात्रै थप कमायो। योसँगै फिल्मको व्यापार ३ लाख ९१ हजार रूपैयाँ पुगेको हो। यसको व्यापारमा अघिल्लो साताको तुलनामा ८० प्रतिशतभन्दा बढीले गिरावट आएको देखिन्छ।
जेठ ८ गते रिलिज 'मितज्यू' ले आफ्नो बक्स अफिस कमाइ १ करोड ३२ लाख ५३ हजार रूपैयाँ पुर्याएको छ। यद्यपि, यो फिल्मको व्यापारमा पनि पछिल्लो साता निकै गिरावट आएको देखिन्छ। जेठ २४ सम्म १ करोड ३१ लाख ११ हजार रूपैयाँ कमाएको फिल्मले पछिल्लो साता १ लाख ४२ हजार रूपैयाँ मात्रै थप कमायो। यसअघिको साता फिल्मले १० लाख रूपैयाँभन्दा बढी कमाइ गरेको थियो।
'मितज्यू'सँगै एकै मितिमा रिलिज 'काजी' को व्यापार ४४ लाख ४८ लाख रूपैयाँ पुगेको छ। अघिल्लो साता बक्स अफिस रिपोर्ट सार्वजनिक हुँदा यो फिल्मको ग्रस कमाइ ४४ लाख ३८ हजार रूपैयाँ रहेकोमा पछिल्लो साता १० हजार रूपैयाँ हाराहारी मात्रै थप कमाइ गरेको हो।
जेठ १ मा रिलिज फिल्म 'लाइफ ड्यामेज' को ग्रस कमाइ ३४ लाख ६६ हजार रूपैयाँ नाघेको छ। यो फिल्मको व्यापारमा पनि पछिल्लो साता निकै गिरावट आएको देखिन्छ। यसअघिको सातासम्म फिल्मको कमाइ ३४ लाख ४० हजार रूपैयाँ थियो। त्यसयता २६ हजार रूपैयाँ हाराहारी मात्रै थप कमाइ गरेको हो।
जेठ १५ गते प्रदर्शनमा आएका फिल्मपछि जेठ २२ र जेठ २९ गते कुनै नयाँ नेपाली फिल्म रिलिज भएका थिएनन्। असार १ गतेसम्म पनि हलहरू पुरानै फिल्मको भरमा सञ्चालन भइरहेका छन्। नयाँ प्रतिस्पर्धी फिल्म नहुँदा प्रदर्शनरत फिल्मले थप शो पाउने अवसर पाए पनि त्यसअनुसार दर्शक र व्यापार बढ्न सकेको देखिँदैन।
३ लाख बढीले हेरे 'लालीबजार', 'कुम्भ' २ हजारले पनि हेरेनन्
'लालीबजार' को ३ लाखभन्दा बढी टिकट बिक्री भएका छन्। जेठ ३१ गतेसम्म फिल्मले ३ लाख ११ हजार ४०३ दर्शकलाई हलसम्म तानेको चलचित्र विकास बोर्डको विवरणमा उल्लेख छ। त्यस्तै, जेठ १५ गते रिलिज भएको 'रोल नम्बर १' को ४७ हजार १५१ वटा टिकट बिक्री भएका छन्।
सोही मितिमा रिलिज 'कुम्भ' को १ हजार ६७९ वटा मात्रै टिकट बिक्री भएका छन्।
जेठ ८ गते रिलिज भएका फिल्ममध्ये 'मितज्यू' को ४५ हजार १५४ तथा 'काजी'को १४ हजार ३२४ टिकट बिक्री भएका छन।
'लाइफ ड्यामेज' को ११ हजार ३७१ टिकट बिक्री भएको चलचित्र विकास बोर्डको विवरणमा उल्लेख छ।
