यतिबेला हलिउड फिल्म 'अब्सेसन' ले विश्वभर ठूलो चर्चा कमाइरहेको छ। अत्यन्त सानो बजेटमा बनेको फिल्मले बक्स अफिसमा ठूलो सफलता पाइरहेको हो।
विभिन्न अन्तर्राष्ट्रिय व्यापारिक रिपोर्ट अनुसार यो फिल्म करिब ७ लाख ५० हजारदेखि १० लाख अमेरिकी डलर जतिको सानो बजेटमा निर्माण भएको हो। त्यही सानो बजेटको फिल्मले विश्वव्यापी रूपमा हालसम्म करिब २२० मिलियनदेखि २३० मिलियन अमेरिकी डलरसम्मको कमाइ गरिसकेको रिपोर्टहरूमा उल्लेख गरिएको छ।
केही अपडेटेड व्यापारिक विश्लेषण अनुसार यसको कमाइ अझै बढ्दै गई करिब २५० मिलियन डलरसम्म पुग्ने अनुमान गरिएको छ। यसरी हेर्दा फिल्मले आफ्नो निर्माण लागतको करिब २०० देखि ३३० गुणासम्म बढी आम्दानी गर्न सफल भएको देखिन्छ। यसलाई हालका वर्षहरूमा हलिउडको सबभन्दा ठूलो ‘सरप्राइज ब्लकबस्टर’ मध्ये एकका रूपमा लिइएको छ।
फिल्मको कथा एक युवाको वरिपरि घुम्छ, जसले रहस्यमय शक्तिसँग जोडिएको वस्तु प्रयोग गरेर आफ्नो प्रेम प्राप्त गर्ने प्रयास गर्छ। तर इच्छा पूरा भएपछि सम्बन्ध क्रमशः डर, मनोवैज्ञानिक तनाव र नियन्त्रण बाहिर जाने जुनूनमा बदलिन्छ।
विश्वभर दर्शक र समीक्षकबाट राम्रो प्रतिक्रिया पाएको यो फिल्म सामाजिक सञ्जालमा समेत निकै चर्चित बनेको छ।
अन्तर्राष्ट्रिय सञ्चार माध्यमहरूका अनुसार कम बजेटमा बनेर यति ठूलो व्यापार गर्नु अत्यन्तै दुर्लभ मानिन्छ, जसले यस फिल्मलाई वर्षकै सबैभन्दा नाफामूलक फिल्ममध्ये एक बनाएको छ।
क्युरी बार्कर निर्देशित यो फिल्ममा माइकल जोनस्टन र इन्डे नाभारेते शीर्ष भूमिकामा छन्।
नेपालमा पनि यो फिल्मलाई १७ जुन (असार ३) देखि प्रदर्शन गर्ने तयारी भइरहेको छ। क्युएफएक्स, बिगलगायतका मल्टिप्लेक्सले यसलाई 'कमिङ सुन' मा राखेका छन्।
