बलिउडको बहुप्रतीक्षित फिल्म 'रामायण'ले बक्स अफिसमा उत्साहजनक सुरूआत गरेको छ। रणवीर कपूर, साई पल्लवी र यशको मुख्य भूमिका रहेको फिल्मले प्रदर्शनको पहिलो दिन भारतमा ६४ करोड ८५ लाख भारू नेट कलेक्सन गरेको छ।
बक्स अफिस ट्रयाकर सैकनिल्कले सार्वजनिक गरेको तथ्यांकअनुसार 'रामायण'ले पहिलो दिन भारतमा ७७ करोड ५० लाख भारू ग्रस कलेक्सन गरेको हो।
भारतभर २५ हजार २०० शोमार्फत उक्त कमाइ गरेको सैकनिल्कले जनाएको छ।
भाषागत रूपमा हेर्दा फिल्मको हिन्दी संस्करणले सबभन्दा धेरै ४७ करोड ५० लाख भारू नेट कमाएको छ। त्यस्तै, कन्नड संस्करणले ७ करोड २५ लाख, तेलुगुले ६ करोड, तमिलले २ करोड ६० लाख र मलयालम संस्करणले १ करोड ५० लाख भारू कमाएको सैकनिल्कको तथ्यांकमा उल्लेख छ। फिल्मले विदेशी बजारबाट ५० करोड भारू ग्रस कमाएको छ। यससँगै फिल्मको पहिलो दिनको विश्वव्यापी ग्रस कलेक्सन १२७ करोड ५० लाख भारू पुगेको जनाइएको छ।
तर, बलियो ओपनिङका बाबजुद 'रामायण'ले प्रभास अभिनीत फिल्म 'आदिपुरूष'को पहिलो दिनको रेकर्ड भने तोड्न सकेन। सन् २०२३ मा प्रदर्शनमा आएको ‘आदिपुरूष’ले भारतमा पहिलो दिन ८६ करोड ७५ लाख भारू नेट कलेक्सन गरेको थियो। यस हिसाबले ‘रामायण’को ओपनिङ 'आदिपुरूष'भन्दा २१ करोड ९० लाख भारूले कम देखिएको छ।
'आदिपुरूष'ले विश्वव्यापी रूपमा पनि पहिलो दिन करिब १४० करोड भारू ग्रस कलेक्सन गरेको व्यापारिक विवरण सार्वजनिक भएको थियो।
रोचक पक्ष के छ भने 'आदिपुरूष'ले प्रदर्शनको सुरूआतमा बक्स अफिसमा राम्रो व्यापार गरे पनि पछि दर्शकबाट मिश्रित तथा नकारात्मक प्रतिक्रिया पाएको थियो। फिल्मको संवाद, दृश्य प्रस्तुति र पात्रहरूको चित्रणलाई लिएर व्यापक आलोचना भएको थियो। अब 'रामायण'ले भने आगामी दिनमा दर्शकको प्रतिक्रिया र व्यापारमा कस्तो गति लिन्छ भन्ने चासो बढेको छ।
नितेश तिवारी निर्देशित 'रामायण'मा रणवीर कपूर भगवान् राम, साई पल्लवी सीता र यश रावणको भूमिकामा छन्। त्यस्तै, सनी देओल हनुमान र रवि दुबे लक्ष्मणको भूमिकामा देखिएका छन्।
पौराणिक कथामा आधारित यो फिल्मलाई भव्य बजेट र ठूलो स्टारकास्टका कारण प्रदर्शनअघि नै चर्चामा राखिएको थियो।
'रामायण' नेपालमा पनि बिहीबारदेखि नै प्रदर्शनमा आएको छ। प्रदर्शनको सुरूआतदेखि नै नेपाली दर्शकको राम्रो साथ पाएको फिल्मले यहाँ पनि उत्साहजनक व्यापार गरिरहेको छ।
