गैरआवासीय नेपाली संघ(एनआरएनए)को १२ औं महाधिवेशन शनिबारदेखि काठमाडौंमा सुरू हुँदैछ।
फागुन ३० गतेदेखि चैत २ गतेसम्म हुने महाधिवेशनको सबै तयारी पुरा भएको एनआरएनएले जनाएको छ।
महाधिवेशनको उद्घाटन फागुन ३० गते बिहान ९ बजे हुनेछ भने साँझदेखि नयाँ नेतृत्वको लागि निर्वाचन प्रक्रिया सुरू हुनेछ। निर्वाचन भौतिक र अनलाइन गरी हाइब्रिड मोडेलमा हुने र ४ हजार २८६ प्रतिनिधिले भौतिक र अनलाइन माध्यमबाट निर्वाचनमा सहभागिता जनाउने एनआरएनले जनाएको छ।
यद्यपि यसपटक सर्वसम्मतिको पहल गरिरहेको एनआरएनएका अध्यक्षद्वय बद्री केसी र महेश श्रेष्ठले जानकारी दिएका छन्।
एनआरएनएले गरेको पत्रकार सम्मेलनमा बोल्दै एनआरएनए अध्यक्ष बद्री केसीले सहमतिका लागि धेरै नजिक पुगेको बताए।
‘अध्यक्षका एक उम्मेदवारले आफ्नो उम्मेवारी फिर्ता लिइसक्नुभएको छ। यसले हामीलाई सहमतिका लागि सहज बनाएको छ। भोलिसम्म विस्तृत खाका तयार हुने हाम्रो अपेक्षा छ,’ केसीले भने, ‘यो अधिवेशनमा आएकाहरू पद लिनभन्दा पनि त्याग गर्नको लागि आउनुभएको छ। निर्वाचनमा सधैं ब्यालेट बक्स थाप्नै पर्छ भन्ने छैन।’
उनले अबको निर्वाचनमा भने विश्वभर रहेका प्रत्येक गैरआवासीय नेपालीले मतदान गर्न पाउने गरि तयारी गरिने उनले बताए।
अर्का अध्यक्ष महेश श्रेष्ठले एनआरएनएभित्र वृहत एकताको लागि अझै प्रयास भइरहेको बताए।
उनले नेपालमा लगानी ल्याउनको लागि धेरै खालका झन्झट मिलाउन पर्ने धारणा राखे।
पूर्व अध्यक्ष विनोद कुँवरले १२ औं महाधिवेशनले हामी एक ठाउमा रहेको सन्देश दिनुपर्ने बताए।विभिन्न देशमा विभाजित एनआरएनएलाई एक बनाउनुपर्ने उनको भनाई थियो।
पूर्व अध्यक्ष आरके शर्माले मध्यपूर्वलाई समेट्न नसकेकोमा दुःख व्यक्त गरे। १२ औं महाधिवेशन गर्नैपर्ने बाध्यताले यस्तो हुन गएको भन्दै उनले मध्यपूर्वमा रहेका गैरआवासीय नेपालीसँग माफी मागेका थिए।
-1746009348.jpg)
