गैरआवासीय नेपाली संघ (एनआरएनए) का अध्यक्ष बद्री केसीले सरकारले दिएको गैरआवासीय नेपाली नागरिकता काम नलाग्ने भएको बताएका छन्।
शनिबार काठमाडौंमा आयोजित गैरआवासीय नेपाली संघको १२ औं एकता महाधिवेशनमा उनले सरकारको नीतिगत कमजोरीका कारण गैरआवासीय नेपाली नागरिकताको प्रमाणपत्र प्रभावकारी नभएको बताए।
सरकारले गैरआवासीय नेपाली नागरिकताको कानूनी अधिकार स्पष्ट गर्ने ऐन नबनाई प्रमाणपत्र वितरण गरेको उनको आरोप छ।
उनले विदेशी नागरिकता लिएका धेरै नेपालीले विगतमा आफ्नो पुरानो नेपाली नागरिकता प्रयोग गरेर नेपालमा कामकाज गर्दै आएको बताए। तर जब गैरआवासीय नेपाली नागरिकता लिएपछि पुरानो नागरिकता पनि नभएको र नयाँले पनि काम नगर्ने स्थिति रहेको उनको भनाइ छ।
अध्यक्ष केसीले अब बन्ने सरकारले गैरआवासीय नेपाली नागरिकता सम्बन्धी ऐन छिट्टै ल्याउनुपर्ने बताए।
उनका अनुसार परराष्ट्र मन्त्रालयले सरोकारवालहरूको सहभागितामा उक्त ऐनको मस्यौदा तयार गरिसकेको छ। सो ऐनलाई आगामी सरकारले १०० दिनभित्र संसदमा पेस गरेर कार्यान्वयनमा ल्याउन उनले माग गरे।
उनले भने, ‘आजभन्दा दुई वर्ष अगाडि मैले प्रधानमन्त्रीज्यूको हातबाट गैरआवासीय नेपाली नागरिकता लिएको थिएँ। त्यो नेपाल सरकारले दिएको नागरिकताको प्रमाणपत्र आज नचल्ने भएको छ। यो नागरिकताको प्रमाणपत्र चल्ने बनाउनको लागि गैरआवासीय नेपाली ऐनमा परिवर्तन गर्नुपर्नेछ। यो नेपाल सरकारको कमजोरी हो। कुनै पनि प्रमाणपत्र दिनु अगाडि त्यो प्रमाणपत्रले पाउनुपर्ने अधिकार के हो भन्ने कानून नबनाई प्रमाणपत्र हामीलाई दिइएको छ। पहिलापहिला विदेशी नागरिकता लिए पनि मैले नेपालमा पुरानो नेपालको नागरिकता चलाएर काम गर्थे, आज लाखौं नेपालीहरूले त्यसै गरिरहेका छन्।’
उनले अगाडि भने, ‘हामीले लुकाउनुपर्ने यहाँ कुनै कारण छैन। तर जब गैरआवासीयन नेपाली नागरिकता लियौँ, हाम्रो पुरानो क्यान्सिल भइसकेको नागरिक हो, त्यो पनि हातमा छैन। नयाँ नागरिकताले काम गर्न पाएका छैनौँ। अब बन्ने सरकारले गैरआवासीय नेपाली नागरिकतासम्बन्धी ऐन छिट्टै ल्यायोस् भन्ने आग्रह गर्न चाहन्छु। परराष्ट्र मन्त्रालयले यसको मस्यौदा तयार पारिसकेको छ। अब आउने सरकारले १०० दिनको कार्यक्रममा गैरआवासीय नेपाली ऐनलाई संसदमा पुर्याएर कार्यान्वयनमा ल्याउनुपर्ने हाम्रो माग छ।’
उनले जुनसुकै देशमा बसोबास गर्ने भएपनि नेपाली मूलका नागरिकहरूलाई गैरआवासीय नेपाली नागरिकता दिनुपर्ने बताए।
नेपाली भाषी सम्पूर्णलाई गैरआवासीय नेपाली नागरिकता दिएर उनीहरूको लगानी पहिला नेपाल भित्र्याउनुपर्ने उनको भनाइ छ।
उनले अहिले नेपालमा नेपालीहरूलाई नै लगानी भित्र्याउन समस्या भइरहेको बताए।
नेपालमा लगानी गर्न चाहने गैरआवासीय नेपालीहरूलाई लगानीको सीमा तोकिएको उनको गुनासो छ।
उनले सरकारी प्रक्रियागत ढिलाइका कारण धेरै काम रोकिने गरेको बताए।
उनले हाल मध्यपूर्वमा भइरहेका तनावका कारण नेपालीहरू ठूलो समस्यामा परेको बताउँदै उनीहरूको सुरक्षाको लागि सरकारले ध्यान दिनुपर्ने बताए।नेपालीहरूको सुरक्षा नेपाल सरकारको दायित्व भएको उनको भनाइ छ। – न्युज एजेन्सी नेपाल
-1746009348.jpg)
